مرکزی وزیر قانون کی کار کو رام بن میں حادثہ‘کوئی نقصان نہیں :پولیس

رام بن//
مرکزی وزیر قانون کرن رجیجو ہفتہ کو ایک سڑک حادثے میں بال بال بچ گئے جب ان کی کار رامبن ضلع میں ایک ٹرک سے ٹکرا گئی۔
اس حادثہ کا ایک ویڈیو وائرل بھی ہوا جب سکیورٹی اہلکاروں حادثہ کے بعد موصوف کی کار کے طرف دوڑ رہے تھے۔اس حادثے میں وزیر قانون کو کوئی چوٹ نہیں آئی۔ اس کے ساتھ گاڑی میں سوار تمام افراد محفوظ بتائے جاتے ہیں،تاہم گاڑی کو کچھ نقصان پہنچا ہے۔
پولیس کی جانب سے جاری کئے گئے ایک بیان میں کہا گیا ہے کہ سری نگر جموں شاہراہ پر مرکزی وزیر قانون کی گاڑی کو معمولی حادثہ پیش آیا۔بیان میں کہا گیا ہے’’اس حادثے میں کسی کو کوئی جانی نقصان نہیں ہوا اور عزت مآب وزیر کو بحفاظت منزل مقصود تک پہنچایا گیا‘‘۔
تفصیلات کے مطابق وزیر قانون کرن رجیجو ہفتہ کو اپنی بلٹ پروف کار میں سرینگر جا رہے تھے، جب ان کی کار رامبن سے آگے بانہال کی طرف بڑھی تو ان کی کار کو ٹرک سے ٹکرا گئی۔ یہ معلوم نہیں ہوسکا کہ حادثہ کیسے ہوا، حالانکہ گاڑی کو نقصان پہنچنے کی خبر ہے۔
واضح رہے کہ وزیر قانون کرن رجیجو نے آج جموں یونیورسٹی میں ڈوگری زبان میں آئین ہند کا پہلا ایڈیشن کی رسم رونمائی انجام دی ہے۔
ذرائع ابلاغ کے نمائندوں کی جانب سے اڈانی کا معاملے کے سوال کے جواب میں کرن رجیجو نے کہا کہ ہنڈنبرگ،اڈانی معاملے پر کوئی تبصرہ نہیں کروں گا کیونکہ سپریم کورٹ نے پہلے ہی ایک کمیٹی بنائی ہے جو اس معاملے کی تحقیقات کرے گی۔
ر جیجونے کہا کہ کانگریس پارٹی اس معاملے میں جے پی سی کا مانگ کر کے راہل گاندھی کے سیاسی کیریئر کو چمکانے کی کوشش کر رہی ہے۔انہوں نے کہا کہ ہنڈنبرگ،اڈانی معاملے میں جان بوجھ کر ایشو بنایا جا رہا ہے۔
اس سے پہلے وزیر نے ٹویٹ کیا ’’پورے سفر میں خوبصورت سڑک سے لطف اندوز ہوسکتے ہیں۔‘‘ جب وہ قانونی خدمات کے کیمپ میں شرکت کے لیے جموں سے ادھم پور جا رہے تھے۔