سوپور میں پاکستان میں مقیم حزب کمانڈر کی جائیداد منسلک

سرینگر//
قومی تحقیقاتی ایجنسی (این آئی اے ) نے جمعے کو شمالی کشمیر کے ضلع بارہمولہ کے سوپور قصبے میں حزب المجاہدین کے کمانڈر باسط ریشی کی غیر منقولہ جائیداد کو منسلک کردیا۔
سرکاری ذرائع نے بتایا کہ این آئی اے کی ایک ٹیم نے سوپور میں حزب المجاہدین کے کمانڈر ‘باسط ریشی جو اس وقت پاکستان میں قیام پذیر ہے ‘ کی غیر منقولہ جائیداد کو منسلک کر دیا۔
ذرائع نے کہا کہ این آئی اے نے پولیس کی مدد سے اس جائیداد پر اٹیچمنٹ نوٹس لگا دی۔
نوٹس بورڈ پر لکھا ہے’’عوام کو مطلع کیا جاتا ہے کہ جموں وکشمیر کے ضلع بارہمولہ کے ادی پورہ تحصیل زینہ گیر علاقے میں واقع باسط احمد ریشی، جس کو یو اے پی اے کے تحت ‘دہشت گرد’ قرار دیا گیا ہے ، کے زیر قبضہ۵ء۳مرلوں پر محیط غیر منقولہ جائیداد (زرعی اراضی) کو منسلک کیا جاتا ہے ‘‘۔
مرکزی وزارت امور داخلہ نے اکتوبر۲۰۲۲ میں یمبر زل واری شیوا ڈانگر پورہ سوپور سے تعلق رکھنے والے باسط احمد ریشی کو یو اے پی اے ایکٹ کے تحت ’دہشت گرد‘ قرار دیا تھا۔
وزارت امور داخلہ کا دعویٰ ہے کہ حزب المجاہدین کا رکن باسط ریشی جموں وکشمیر میں تخریبی کارروائیاں انجام دینے اور ٹارگیٹ ہلاکتوں کا منصوبہ بنانے میں ملوث ہے ۔
بتادیں کہ این آئی اے نے یہ کارروائی العمر کے کمانڈر مشتاق زرگر کا سری نگر میں مکان قرق کرنے کے ایک دن بعد انجام دی۔