سوریہ کمار یادو کی بہترین بلے بازی ، بھارت نے سیریز جیت لی

راجکوٹ//
سوریہ کمار یادو کی جارحانہ بلے بازی کی بدولت ہندوستان نے تیسرے ٹی ٹوئنٹی انٹرنیشنل میں سری لنکا کو 91رنز سے شکست دے کر سیریز 2-1سے اپنے نام کر لی ۔پہلے بلے بازی کرتے ہوئے ہندوستان نے مقررہ 20اورز میں سری لنکا کو 229رنز کا ہدف دیا جس کے جواب میں سری لنکا کی پوری ٹیم 137رنز پر آئو ٹ ہوگئی ۔
ہندوستان نے 360 ڈگری بلے باز سوریہ کمار یادو (112 ناٹ آؤٹ) کی دھماکہ خیز سنچری کی بدولت تیسرے ٹی- 20 انٹرنیشنل میں سری لنکا کو 229 رنز کا ہدف دیا۔
ارشدیپ سنگھ نے 2.4اورز میں 20رنز دے کر تین کھلاڑیوں کوآئوٹ کیا جبکہ عمران ملک ، چہل اور اور ہاردک پانڈیا نے دو دو وکٹیں حاصل کیں۔
ہندوستان نے ٹاس جیت کر بلے بازی کا فیصلہ کیا۔ پہلے اوور میں ایشان کشن کا وکٹ گرنے کے بعد راہل ترپاٹھی اور شبمن گل نے چارج سنبھالا اور پاور پلے میں 49 رنز جوڑے۔ ترپاٹھی نے 16 گیندوں پر پانچ چوکوں اور دو چھکوں کی مدد سے 35 رنز بنائے جس کے بعد وہ چمیکا کرونارتنے کے ہاتھوں آؤٹ ہوئے۔
جب سوریہ کمار وکٹ پر آئے تو ہندوستان کا اسکور 5.5 اوور میں 52/2 تھا۔ اپنے انداز میں اننگز کی رفتار کو بدلتے ہوئے انہوں نے گیل کے ساتھ تیسرے وکٹ کے لیے 53 گیندوں پر 111 رنز کی شراکت داری کی۔ گیل نے 36 گیندوں پر دو چوکوں اور تین چھکوں کی مدد سے 46 رنز بنائے، حالانکہ وہ وینندو ہسرنگا کے ہاتھوں بولڈ ہوگئے۔
اس کے بعد سری لنکا نے کپتان ہاردک پانڈیا اور دیپک ہڈا کو بھی چار- چار رنز کے اسکور پر پویلین بھیج دیا ۔تاہم سوریہ کمار یادو نے دھماکہ خیز بلے بازی کا سلسلہ جاری رکھا اور ٹی ٹوئنٹی انٹرنیشنل میں اپنی تیسری سنچری مکمل کی۔ سوریہ کمار نے 51 گیندوں کی اپنی اننگز میں سات چوکے اور نو چھکے لگا کر 112 رنز بنائے۔ اکشر پٹیل نے آخر میں ان کا ساتھ دیا اور نو گیندوں میں 21 رنز کی اہم شراکت کی جس کی مدد سے ہندوستان نے 20 اوور میں 228 رنز بنائے۔
سری لنکا کے لیے دلشان مدوشنکا سب سے مہنگے ثابت ہوئے، انہوں نے اپنے چار اوورز میں 55 رنز دے کر دو وکٹ لیے۔ چمیکا کرونارتنے نے چار اوورز میں 52 رنز دے کر ایک وکٹ حاصل کیا، جب کہ کسن راجیتھا اور ہسرنگا کو بھی ایک وکٹ کی کامیابی ملی۔