سڈنی//
ٹیسٹ کرکٹ میں سنچری اور پھر اس کے بعد ڈبل سنچری اور ٹرپل سنچری کے سنگ میل تک پہنچنا ہر بیٹر کا خواب ہوتا ہے۔ لیکن آسٹریلین بلے باز عثمان خواجہ کا یہ خواب کپتان پیٹ کمنز نے پورا نہ ہونے دیا۔
جنوبی افریقہ کے خلاف سڈنی ٹیسٹ کی پہلی اننگز میں میچ کے دوسرے دن تک آسٹریلیا نے 478 رنز بنا لیے تھے، جہاں اوپنر عثمان خواجہ 195 رنز پر ناٹ آؤٹ تھے۔
اس کے بعد سڈنی میچ بارش کے باعث روک دیا گیا، مسلسل بارش کے باعث دوسرے دن کا کھیل ختم ہوا جبکہ تیسرے دن کا کھیل بھی بارش کی نذر ہوا۔
چوتھے دن بھی کھانے کے وقفے تک میچ نہ ہوسکا، تاہم جب بارش نے میچ شروع کرنے کا موقع دیا تو ایسے میں پیٹ کمنز نے عثمان خواجہ اور میٹ مینشا کو اننگز دوبارہ شروع کرنے اور عثمان خواجہ کو ڈبل سنچری بنانے کا موقع دینے کے بجائے اننگز ہی ڈکلیئر کردی۔
واضح رہے کہ سنگ میل تک پہنچنے سے چند رنز دوری پر کسی کپتان کی جانب سے یہ اننگز کو ڈکلیئر کرنے کا پہلا واقعہ نہیں ہے۔
سابق کپتان عمران خان نے بھارت کے خلاف حیدرآباد 1983 میں ٹیسٹ میں اس وقت اننگز ڈکلیئر کردی تھی جب جاوید میانداد 280 پر بیٹنگ کر رہے تھے۔
اسی طرح جنوبی افریقی کپتان گریم اسمتھ نے پاکستان کے خلاف 2010 میں ابوظبی ٹیسٹ کی اننگز اس وقت ڈکلیئر کردی تھی جب اے بی ڈی ویلیئر 278 رنز پر ناٹ آؤٹ تھے۔
پاکستان ہی کیخلاف 2004 میں ملتان ٹیسٹ میں راہول ڈریوڈ نے اننگز ڈکلیئر کرتے ہوئے 194 رنز پر ناٹ آؤٹ سچن ٹنڈولکر اور ان کے مداحوں کو حیران کردیا تھا۔
