وادی کے بالائی اور میدانی علاقوںمیں برفباری

سرینگر//
محکمہ موسمیات کی پیش گوئی کے عین مطابق جمعرات کی سہ پہر سے ہی وادی کشمیر کے لگ بھگ تمام حصوں میں برف باری کا سلسلہ شرع ہوا اور شام ڈھلنے کے تک سرینگر سمیت پوری وادی نے برف کی سفید چادر اوڑھ لی۔
یہ تازہ برف باری جہاںچالیس روزہ چلہ کلان کی پہلی برف باری ہے وہیں دوسری طرف اس سے سردی کی شدت میں قدرے کمی محسوس کی گئی اور خشک موسم کے ایک طویل سلسلے کا خاتمہ بھی ہوگیا۔
تفصیلات کے مطابق وادی کے بالائی علاقوں بشمول سیاحتی مقامات گلمرگ، پہلگام، سونہ مرگ، ٹنگہ مرگ وغیرہ میں شام ہونے تک دو سے تین انچ برف جمع ہوئی تھی جبکہ میدانی علاقوں بشمول سری نگر میں صحنوں، پارکوں، مکان کے چھتوں پر برف جمع ہونے لگی تھی۔
جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ کو تازہ برف باری کے نتیجے میں جمعرات کے روز ٹریفک کی آمدورفت کیلئے بند کردیا گیا جبکہ سرینگر جموں شاہراہ پر رام بن کے مقام پر چٹانیں کھسک آنے کے نتیجے میں تین سو کلومیٹر لمبی شاہراہ کو بھی ٹریفک کیلئے بند کیا گیا ہے ۔
ٹریفک حکام نے بتایا کہ تاریخی مغل روڈ کو تازہ برف باری کے پیش نظر ٹریفک کی نقل وحمل کے لئے احتیاطی طورپر بند کر دیا گیا۔
حکام نے بتایا کہ شاہراہ پر برف باری کی وجہ سے پھسلن پیدا ہوئی جس وجہ سے لوگوں کے جان ومال کو تحفظ فراہم کرنے کی خاطر شاہراہ کو بند کیا گیا ہے ۔
دریں اثنا سری نگر جموں شاہراہ پر رام بن کے مقام پر چٹانیں کھسک آنے کے نتیجے میں تین سو کلومیٹر لمبی شاہراہ کو بھی شام دیر گئے ٹریفک کی نقل وحمل کے لئے بند کردیا گیا۔
محکمہ موسمیات کے ایک ترجمان کے مطابق وادی میں۲۹دسمبر کی رات سے۳۰دسمبر تک کہیں کہیں رک رک کر ہلکی سے درمیانی درجے کی برفباری کا امکان ہے ۔انہوں نے کہا کہ بعد ازاں موسم میں بتدریج بہتری واقع ہوسکتی ہے اور۵جنوری تک موسم خشک رہنے کا امکان ہے ۔
دریں اثنا وادی کے مختلف سیاحتی مقامات اور سری نگر میں موجود غیر مقامی سیاحوں کو تازہ برف باری سے لطف اندوز ہوتے ہوئے دیکھا گیا۔
اس دوران گرمائی دارلحکومت سری نگر میں کم سے کم درجہ حرارت منفی۲ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۶ء۵ڈگری سینٹی گریڈ ریکارڈ ہوا تھا۔
سرینگر میں۲۵دسمبر کو رواں سیزن کی سرد ترین رات ریکارڈ ہوئی تھی جب کم سے کم درجہ حرارت منفی۸ء۵ ڈگری سینٹی گریڈ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت منفی۸ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۰ء۶ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت منفی۵ء۴ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی۴ء۷ ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت منفی۳ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۵ء۵ڈگری سینٹی گریڈ ریکارڈ ہوا تھا۔
قصبہ قاضی گنڈ میں کم سے کم درجہ حرارت منفی۲ء۳ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۰ء۵ڈگری سینٹی گریڈ ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت منفی۶ء۱۲ڈگری سینٹی گریڈ ریکارڈ کیا گیا جبکہ ضلع کرگل میں کم سے کم درجہ حرارت منفی۸ء۱۰ڈگری سینٹی گریڈ ریکارڈ ہوا ہے ۔