جموں کشمیر میں بہت جلد اسمبلی چناؤ ہونگے‘تمام رکاوٹیں دور کی گئی ہیں:چگ

جموں//
بھارتیہ جنتاپارٹی(بی جے پی) کے قومی جنرل سیکریٹری ‘ترون چگ نے جمعے کے روز کہا کہ جموں کشمیر میں بہت جلد اسمبلی چناو ہونگے ۔
چگ نے کہاکہ جموں وکشمیر میں بھاجپا اگلی سرکار بنانے میں کامیا ب ہوجائے گی۔
ان باتوں کا اظہار بی جے پی لیڈر نے جموں میں نامہ نگاروں سے بات چیت کے دوران کیا۔
چگ نے کہاکہ بھاجپا جموں وکشمیر میں جلد چناؤ کرانے کے حق میں ہے اور اس ضمن میں بی جے پی نے سبھی کانٹوں کو دور کیا۔انہوں نے مزید کہاکہ الیکشن کمیشن ووٹنگ فہرستوں پر اعتراضات کی خاطر سیاسی پارٹیوں کو اپنی آراء پیش کرنے کے بارے میں آگاہ کرے گا اور اُس کے بعد کسی بھی وقت چناو ہونگے ۔
قومی جنرل سیکریٹری نے بتایا کہ جموں وکشمیر میں بی جے پی اپنے بل بوتے پر حکومت بنانے میں کامیاب ہوگی اور اگلا وزیر اعلیٰ بھی بھاجپا کا ہی ہوگا۔
چگ نے کہاکہ ملک کے سبھی فرقوں سے وابستہ لوگوں نے وزیر اعظم مودی پر بھروسہ جتایا ہے اور ہمیں پورا یقین ہے کہ آنے والے پارلیمان انتخابات‘ جو سال۲۰۲۴میں ہونے جارہے ہیں‘ بھاجپا واحد بڑی پارٹی کے طورپر اُبھر کر سامنے آئے گی۔
اُن کے مطا بق گجرات چناؤ میں بی جے پی کو جس طرح سے لوگوں نے سپورٹ کیا اُس کی جتنی بھی تعریف کی جائے کم ہے ۔انہوں نے کہا’’لوگوں نے بی جے پی پر بھروسہ کیا اور جموں کشمیر کے اسمبلی انتخابات میں بھی لوگ بی جے پی اُمیدواروں کے حق میں اپنے ووٹ کا استعمال کریں گے ۔‘‘
اس بات کا اغلب امکان ہے کہ جموں کشمیر میں اسمبلی انتخاب اگلے سال کے پہلے حصے میں ہوں ‘ لیکن حتمی فیصلہ سکیورٹی صورتحال کو دھیان میں رکھ کر ہی کیا جائیگا ۔