سرینگر/16 نومبر
جموں وکشمیر پیپلز کانفرنس (پی سی)کے صدر‘ سجاد غنی لون کا کہنا ہے کہ موجودہ حالات میں لوگوں خاص طور پر نوجوانوں کے مفادات کے تحفظ کو یقینی بنانا جموں و کشمیر کی لیڈرشپ کو در پیش سب سے بڑا چلینج ہے ۔
لون نے کہا کہ ہماری جماعت عام کشمیری کو نشانہ بننے سے بچانے کے لئے ہر ممکن کوشش کرے گی۔
پیپلز کانفرنس کے صدر نے ان باتوں کا اظہار یہاں بدھ کو پارٹی کے صدر کی حیثیت سے حلف اٹھانے کے بعد پارٹی کارکنوں سے خطاب کے دوران کیا۔ اس موقع پر پارٹی کے اعلیٰ لیڈران بھی موجود تھے ۔
لون نے کہا”مختلف موقعوں پر لیڈر شپ کے مختلف معنیٰ ہوتے ہیں اور موجودہ دور میں لیڈرشپ کا مطلب لوگوں کو تحفظ فراہم کرنا، نوجوانوں کی حفاظت کرنا اور لوگوں کے سامنے سچ بولنا ہے “۔
پی سی صدر کا کہنا تھا”سیاست میں سب سے آسان کام جھوٹ کا سہارا لینا ہے جبکہ سب سے مشکل کام لوگوں کے سامنے سچ بولنا ہے ہم پیپلز کانفرنس میں رہ لوگوں کے سامنے سچ بولنے اور لوگوں کی ایمانداری سے رہنمائی کرنے کی کوشش کریں گے “۔
لون نے کہا کہ وقت آگیا ہے کہ لیڈر سچ بول کر لوگوں کی رہنمائی کریں اور لوگ ان ہی لیڈروں کا ساتھ دیں جو سچ بولیں۔انہوں نے کہا کہ جموں وکشمیر کے لوگوں خاص طور پر نوجوانوں کے مفادات کی حفاظت کرنا موجودہ لیڈر شپ کو در پیش سب سے بڑا چیلنج ہے ۔
پی سی صدر کا کہنا تھا کہ ہماری پارٹی لوگوں کو نشانہ بننے سے بچانے کی ہر ممکن کوشش کرے گی۔انہوں نے کہا کہ پیپلز کانفرنس ایک ایسی پارٹی ہے جس نے قربانیاں دی ہیں اور ہم کوشاں رہیں گے تاکہ لوگوں کو با وقار زندگی گذار سکیں۔
لون نے کہا کہ ہم جموں و کشمیر کے شاندار سیاسی وراثت کو بحال کرنے کے لئے ہر ممکن کوشش کریں گے جس کے یہاں کے لوگ مستحق ہیں۔