بی جے پی حکومت نے کر گل جنگ لڑنے کیلئے افواج کو پوری طاقت دی:مودی

ہمیر پور//
وزیر اعظم‘ نریندر مودی نے بدھ کو ہماچل پردیش کے فوجیوں سے اپیل کی کہ وہ اپنی بہتری کے لیے بی جے پی پر بھروسہ رکھیں اور اس کی حمایت کریں۔
یہ بات مودی نے ہمیر پور ضلع کے سوجان پور ٹیرہ میں انتخابی جلسے سے خطاب کرتے ہوئے کہی۔
ریاست میں ۱۲ نومبر کو انتخابات ہو رہے ہیں۔
وزیر اعظم نے کہا ’’میں آپ کا پردھان سیوک ہوں اور اسی حیثیت میں میں آپ کی پارٹی کیلئے ووٹ مانگنے آیا ہوں اور مجھے امید ہے کہ لوگ بی جے پی اور اس کے امیدواروں کو اجتماعی طور پر ووٹ دیں گے۔‘‘
قوم کے شہدا کو دلی خراج عقیدت پیش کرتے ہوئے مودی نے کہا کہ انہیں ایک ایسی جگہ آنے پر فخر ہے جو فوجیوں، سابق فوجیوں اور ان کے خاندانوں کی خدمت کرنے والے کارکنوں کا مرکز ہے۔انہوں نے کہا کہ بی جے پی حکومت نے کرگل جنگ لڑنے کیلئے ہندستانی افواج کو پوری طاقت دی جس کی وجہ سے یہ جنگ جیتی گئی۔
وزیراعظم نے کہا کہ ڈبل انجن والی حکومت نے بیٹیوں کے لیے بہت کچھ کیا۔ انہوں نے کہا کہ کانگریس نے ہمیشہ ہماچل کو دھوکہ دیا ہے۔ مودی نے لوگوں کو خبردار کیا کہ اگر انہوں نے کانگریس کو ووٹ دیا تو وہ ۲۰۱۴ سے بی جے پی نے انہیں جو کچھ دیا ہے وہ کھو دیں گے۔
مودی نے کہا کہ کانگریس پارلیمنٹ میں کچھ نہیں کرتی اور ہمیشہ واک آؤٹ کرنا اور نقصان پہنچانا پسند کرتی ہے۔
وزیر اعظم نے کہا کہ ہماچل پردیش میں دس ہزار کروڑ روپے کے قومی شاہراہ کے منصوبے چل رہے ہیں اور یہ کام چار سال میں مکمل ہو جائے گا۔