’بجلی کی غیر اعلانیہ کٹوتی ناقابل قبول‘

جموں//
جموں کشمیر کے چیف سیکریٹری‘ڈاکٹر ارون کمار مہتا نے غیر اعلانیہ بجلی کٹوتی کو ناقابل قبول قرار دیتے ہوئے کہا ہے کہ صارفین کو پیشگی میں بجلی سپلائی کی فراہمی کا شیڈول دستیاب ہو نا چاہئے ۔
چیف سیکریٹری نے آج یہاں سول سیکرٹریٹ میں پاور ڈسٹری بیوشن کمپنیوں ( ڈی آئی ایس سی او ایم ایس ) کی سرمائی تیاریوں کا جائزہ لینے کے لئے منعقدہ میٹنگ کی صدارت کی۔
ایک سرکاری بیان کے مطابق ڈاکٹر مہتا نے محکمہ کو ہدایت دی کہ وہ اِس بات کو یقینی بنائے کہ جہاں بھی ضرورت ہو بجلی کی کٹوتی کے شیڈول کی پہلے سے تشہیر کی جائے تاکہ صارفین اِس کے مطابق اَپنی سرگرمیوں کی منصوبہ بندی کرسکیں۔انہوں نے غیر اعلانیہ بجلی کٹوتی کو نا قابل قبول قرار دیا ۔
چیف سیکریٹری نے کہا کہ نقصانات کو کم کرنے اور صارفین کو بجلی کی باقاعدہ فراہمی کو یقینی بنانے کیلئے ڈیمانڈ سائیڈ مینجمنٹ اِنتہائی اہمیت کی حامل ہے ۔ اِس مقصد کیلئے بجلی چوری کے خلاف مؤثر نفاذ کرنا ہوگا۔
ڈاکٹر مہتا نے رام ۔ کشتواڑ اور سونہ مرگ اور گریز کے درمیان بجلی لائنوں کی تنصیب کے عمل کو تیز کرنے پر زور دیا۔
چیف سیکریٹری نے بجلی کے مجموعی منظر نامے کا جائزہ لیتے ہوئے یوٹی سے موثر اور سستی بجلی کی خریداری کیلئے پیشہ ورانہ کنسلٹنٹس کی خدمات حاصل کرنے پر زو ر دیا۔ اُنہوں نے پاور پر چیز ایگری منٹ ( پی پی اے )سے یا پاور ایکس چیجز سے ایسی خریداروں کیلئے طریقہ کار وضع کرنے پر بھی زور دیا۔
ڈاکٹر مہتا نے اَفسران کو ہدایت دی کہ وہ باقاعدہ صارفین اور ایمنسٹی اَداکرنے والوں سے ریونیو کی وصولی کے اہداف مقرر کریں اور اِس عمل کی کارکردگی کو یقینی بنائیں ۔اُنہوں نے مارچ۲۰۲۳ء تک سرینگر اور جموں شہروں میں ہرایک میں کم سے کم۵ء۱لاکھ سمارٹ میٹر لگانے کی ہدایات کو دہرایا۔
چیف سیکریٹری نے اَفسران کو ہدایت دی کہ وہ اِس بات کو یقینی بنائیں کہ سرکاری ورکشاپوں کو سپیئر پارٹس سے بھرا جائے‘ ٹرانسفارمروں کا معائنہ کیا جائے اور زیادہ کھپت کے موسم میں مانگ کو پورا کرنے کیلئے ٹرانسفارمروں کا وافر ذخیرہ رکھا جائے۔ اُنہوں نے کہاکہ بِلنگ کا فلیٹ ریٹ سسٹم جلد ختم کیا جائے گا۔
ڈاکٹر مہتا نے زائد اَز۹۰ فیصد نقصان والے فیڈروں کے اِنچارج اَفسران اور ملازمین کے خلاف فوری تادیبی کارروائی مکمل کرنے کی ہدایت دی ۔ اُنہوں نے زور دیا کہ مجموعی تکنیکی اور تجارتی ( اے ٹی اینڈ سی) نقصانات کو۱۵فیصد سے کم رکھا جانا چاہیے۔
میٹنگ میںپرنسپل سیکرٹری پاور ڈیولپمنٹ ڈیپارٹمنٹ ایچ راجیش پرساد، منیجنگ ڈائریکٹر جے پی ڈی سی ایل شیوا ننت طائل اور منیجنگ ڈائریکٹر پی ڈی سی ایل یاسین ایم چودھری اورڈِسکامز کے دیگر سینئر اَفسران نے شرکت کی۔