ایس آئی گھوٹالہ: پولیس آفیسر سمیت مزید چار ملزمان کو حراست میں لیاگیا

جموں//
سینٹرل بیورو آف انوسٹی گیشن (سی بی آئی )نے سب انسپکٹر گھوٹالہ میں ملوث مزید چار ملزمان کو حراست میں لے لیا ہے ۔
بتادیں کہ تحقیقاتی ایجنسی نے ابھی تک اس معاملے میں بی ایس ایف کمانڈنٹ‘ پولیس آفیسر،سی آر پی ایف کانسٹیبل سمیت ۱۳؍افراد کو دھر دبوچ کر سلاخوں کے پیچھے دھکیل دیا۔
اطلاعات کے مطابق سینٹرل بیورو آف انوسٹی گیشن (سی بی آئی ) نے سب انسپکٹر گھوٹالہ میں ملوث مزید چار افرادکی گرفتاری عمل میں لائی ہے ۔
ذرائع نے بتایا کہ ایجنسی نے اسسٹنٹ سب انسپکٹر اشوک کمار، سی آر پی ایف کانسٹیبل سریندر کمار،وجندر سنگھ ساکن ہریانہ اور پردیپ کمار ساکن نئی دہلی کو حراست میں لے لیا ہے ۔
ذرائع کا کہنا ہے کہ پردیپ کمار ساکن نئی دہلی راجدھانی میں پرنٹنگ پریس میں کام کرتا ہے اور اسی پرنٹنگ پریس پر ایس آئی امتحان کے پرچے لیک کئے گئے ۔
اسسٹنٹ سب انسپکٹر اشوک کمار جو کہ جموں کے پالنوالہ کا ساکن ہے کا بیٹا، بیٹی اور داماد لسٹ میں سرفہرست تھا۔
باوثوق ذرائع نے بتایا کہ گرفتا رشدگان کے ساتھ سی بی آئی نے پوچھ تاچھ کی جس دوران سروسز سلیکشن بورڈ کے چار سینئر آفیسران کا نام بھی سامنے آیا ہے ۔
معلوم ہوا ہے کہ ایس آئی امتحانات میں ہوئی دھاندلیوں میں مبینہ طور پر ملوث سروسز سلیکشن بورڈ کے سابق آفیسران کی کسی بھی وقت گرفتاری متوقع ہے ۔
ذرائع نے بتایا کہ گرفتار اسسٹنٹ سب انسپکٹر اشوک کمار نے نہ صرف اپنے تین نزدیکی رشتہ داروں کو قبل از وقت پرچے فراہم کئے تھے بلکہ دوسرے امیدواروں میں بھی پرچے فروخت کرکے اپنے لئے شکم سیری کا سامان پیدا کیا۔
ذرائع نے بتایا کہ پردیپ کمار نئی دہلی پرنٹنگ پریس میں بطور انچارج کام کررہا ہے اور جب وہاں پر ایس آئی امتحان کے پرچے پرنٹ ہو رہے تھے تو اسی دوران ملزم نے کچھ پیپر وہاں سے اُٹھائے ۔
مزید چار افرادکی گرفتاری کے بعد سی بی آئی کی جانب سے اس معاملے میں اب تک ۱۳؍افراد کو حراست میں لیا ہے ۔
ذرائع نے بتایا کہ سی بی آئی کو پوچھ تاچھ کے دوران گرفتار شدگان نے چونکا دینے والے انکشافات کئے اورمذکورہ ریکٹ کئی بھرتی گوٹالوں میں براہ راست ملوث ہیں۔