پولیس کا تین ہائبرڈ جنگجوؤں کی گرفتاری

سرینگر//
پولیس اور سیکورٹی فورسز نے منگل کو تین ہائبرڈ دہشت گردوں کو گرفتار کرکے ایک بڑے سانحہ کو ٹالا ہے جن کے قبضے سے منگل کو۱۰ کلوگرام آئی ای ڈی اور دو دستی بم برآمد ہوئے ہیں۔
ایک پولیس اہلکار نے بتایا کہ سرینگر پولیس نے دو ہائبرڈ دہشت گردوں ‘عامر مشتاق ڈار ولد مشتاق احمد ڈار سکنہ اقبال آباد سوزیت بڈگام اور کابل رشید ولد عبدالرشید ڈار سکوپ محلہ ایچ ایم ٹی سرینگر کو ہرنمبل ناکے پرآج گرفتار کیا۔
اہلکار نے کہا’’ان کے قبضے سے دو دستی بم برآمد ہوئے۔ انہوں نے اپنے ایک اور ساتھی عاقب جمال بھٹ ولد محمد جمال بھٹ ولد سوزیت بڈگام کے نام کا انکشاف کیا جسے بھی گرفتار کیا گیا اور ابتدائی جانچ کے دوران اس کے قبضے میں آئی ای ڈی کے بارے میں انکشاف کیا گیا تھا‘‘۔
سرینگر پولیس اور۶۲ آر آر کی ایک مشترکہ ٹیم نے اس کی نشاندہی پر رنگریٹھ میں تقریباً دس کلو گرام کا آئی ای ڈی برآمد کی ہے۔
پولیس اہلکار نے کہا کہ ایف آئی آر نمبر۶۹/۲۰۲۲ کے تحت یو اے پی اے، دھماکہ خیز مواد ایکٹ اور آرمس ایکٹ کی متعلقہ دفعات کے تحت تھانہ چھانہ پورہ میں مقدمہ درج کیا گیا ہے۔ تینوں افراد لشکر طیبہ/ٹی آر ایف سے وابستہ ہیں۔
مزید حقائق جاننے کے لیے مزید تفتیش جاری ہے۔