ہندوستان کا نقشہ آج جیسا نہ ہوتا اگر سردار پٹیل نہ ہوتے : شاہ

نئی دہلی/۳۱اکتوبر
مرکزی وزیر داخلہ‘ امت شاہ نے آج کہا کہ سردار ولبھ بھائی پٹیل نے آزادی کے بعد ملک کو متحد کیا اور اگر وہ نہ ہوتے تو ہندوستان کا نقشہ ایسا نہ ہوتا جیسا کہ آج ہے ۔
پیر کو یہاں سردار پٹیل ودیالیہ میں گجرات ایجوکیشن سوسائٹی کی طرف سے سردار پٹیل کی یوم پیدائش کے موقع پر منعقدہ ایک پروگرام سے خطاب کرتے ہوئے شاہ نے کہا”اگر سردار پٹیل نہ ہوتے تو ہندوستان کا نقشہ ایسا نہ ہوتا جیسا کہ آج ہے ۔ لکشدیپ، انڈمان نکوبار، جوناگڑھ، جودھ پور، حیدرآباد اور کشمیر سردار صاحب کی مضبوط قوت ارادی اور قیادت کی وجہ سے آج ہندوستان کا اٹوٹ حصہ ہیں“۔
وزیر داخلہ نے کہا کہ آزادی سے قبل ہندوستان پر حکومت کر رہے برطانیہ نے بھی کہا تھا کہ اس کے حکمرانوں کے جاتے ہی یہ ملک ٹکڑوں میں بٹ جائے گا، لیکن سردار پٹیل نے ان تمام خدشات کو بے بنیاد ثابت کر دیا۔
شاہ کہا کہ برطانیہ کے سابق وزیر اعظم ونسٹن چرچل نے کہا تھا کہ انگریزوں کے جاتے ہی ہندوستان ٹکڑے ٹکڑے ہو جائے گا لیکن سردار صاحب نے ملک کو متحد کیا اور آج ہندوستان برطانیہ کو پیچھے چھوڑ کر دنیا کی 5ویں معیشت بن چکا ہے ۔”سردار پٹیل نے دنیا کی سب سے پختہ جمہوریت کی بنیاد رکھنے کا کام کیا“۔
وفاقی وزیر داخلہ نے کہا کہ سردار پٹیل کے عدم تشدد کے نظریات بھی بہت حقیقی تھے اور انہوں نے ہر مسئلے کا حل تلاش کرکے شہرت حاصل کرنے کی خواہش کے بغیر نتائج لانے کا کام کیا۔انہوں نے کہا کہ سردار پٹیل نے لوگوں سے جڑ کر انہیں سمجھا اور انہیں حب الوطنی کے جذبے سے متاثر کیا۔ انہوں نے کہا” تحریک، حب الوطنی اور لوگوں کی حوصلہ افزائی، یہ صرف خیالات سے نہیں ہوتا اس کے لیے لوگوں سے تعلق، انہیں سمجھنے کی طاقت اور ان جیسا سوچنے کی ضرورت ہوتی ہے اور سردار صاحب ان تینوں کا سنگم تھے ۔وہ ایک کرما یوگی تھے جنہوں نے سخت محنت کی اور زمین پر تخیل کو محسوس کرنے کی کوشش کی“۔
شاہ نے کہا کہ سردار پٹیل نے کسانوں کے استحصال اور تحریک کے خلاف مضبوط آواز اٹھائی اور ان کی قیادت کی۔انہوں نے کہا”یہ سردار پٹیل ہی تھے جنہوں نے ملک میں کوآپریٹو تحریک کو زمین پر اتارنے کا کام کیا۔ 1920-30 کی دہائی میں جب کسانوں کے استحصال کے خلاف آواز بلند ہوئی تو پٹیل جی نے کسانوں کو متحرک کرتے ہوئے تحریکوں کی قیادت کی، جس کے بعد گاندھی جی نے انہیں سردار کا خطاب دیا“۔
اس سے پہلے مرکزی وزیر داخلہ نے کہا کہ مرد آہن سردار ولبھ بھائی پٹیل کے پختہ ارادوں کے سامنے کچھ بھی ناممکن نہیں تھا اور انہوں نے اپنی پوری زندگی ملک کے اتحاد اور سالمیت کو برقرار رکھنے کے لیے وقف کر دی۔
پیر کو یہاں نیشنل اسٹیڈیم میں سردار پٹیل کی یوم پیدائش کے موقع پر منعقدہ رن فار یونٹی (اتحاد کی دوڑ) کے موقع پر خطاب کرتے ہوئے شاہ نے کہا کہ سردار پٹیل نے آزادی کے بعد جدید ہندوستان کی بنیاد رکھی اور اپنی ساری زندگی ملک کے اتحاد اور سالمیت کو برقرار رکھنے کے لئے وقف کردی۔” ان کا نام آتے ہی آج کے ہندوستان کا نقشہ آنکھوں کے سامنے آجاتا ہے ۔ یہ ان کے منفرد سیاسی اور پرعزم ارادوں کا نتیجہ ہے کہ آزادی کے بعد ہندوستان اتحاد کے دھاگے میں بندھا“۔
وفاقی وزیر داخلہ نے کہا کہ اس وقت بھی ملک دشمن طاقتوں نے ہندوستان کو تقسیم کرنے کی سازش میں کوئی کسر نہیں چھوڑی تھی لیکن یہ سازش بھی سردار پٹیل کے ارادوں کو ناکام نہیں بناسکی۔
شاہ نے یقین ظاہر کیا کہ وزیر اعظم نریندر مودی کی قیادت میں جس طرح سے پورا ملک عزم کے ساتھ ترقی کر رہا ہے اور سال۷۴۰۲میں ہم آزادی کی صد سالہ تقریب کے موقع پر سردار پٹیل کے خوابوں کا ہندوستان بنانے میں کامیاب رہیں گے ۔
مرکزی وزیر داخلہ نے کہا کہ برسوں سے سردار پٹیل کو فراموش کرنے کی کوششیں کی گئیں، لیکن سردار پٹیل آج بھی ملک کی نوجوان طاقت کے لیے تحریک کا سب سے بڑا ذریعہ ہیں۔
اس موقع پر انہوں نے تقریب میں موجود لوگوں سے قومی اتحاد کا حلف لیا اور رن فار یونٹی کو ہری جھنڈی دکھا کر روانہ کیا۔کامن ویلتھ گیمز میں میڈل جیتنے والوں کو رن فار یونٹی کے موقع پر خصوصی طور پر مدعو کیا گیا تھا۔