سرینگر/ 25 اکتوبر
بھارتیہ جنتا پارٹی ( بی جے پی) کے سینئر لیڈر اور جموں و کشمیر کے پارٹی کے ترجمان الطاف ٹھاکر نے 26 اکتوبر کو منائے جانے والے یوم الحاق کے موقع پر یو ٹی کے عوام کو مبارکباد دیتے ہوئے کہا کہ اس وقت کے مہاراجہ ہری سنگھ کی دور اندیشی آج صحیح ثابت ہو رہی ہے۔
ٹھاکر نے کہا ” جموں کشمیر الحاق کے ثمرات حاصل کر رہا اور انڈین یونین کا حصہ بن کر جمہوریت کے ثمرات سے لطف اندوز ہو رہا ہے“۔
یوم الحاق کے موقع پر ایک بیان میں ٹھاکر کاکہنا تھا” اکتوبر 1947 میں کچھ لابیوں کی بھرپور کوششوں کے باوجود کہ جموں و کشمیر کو پاکستان جانا چاہئے، مہاراجہ ہری سنگھ نے اس حقیقت کو جانتے ہوئے کہ جموں و کشمیر کے لوگوں کا مستقبل پاکستان کے بجائے ہندوستان کے ساتھ محفوظ رہے گا، پاکستان پر ہندوستانی یونین کو ترجیح دی“۔
ٹھاکر نے کہا کہ وہ تمام لوگ جو آج بھی محسوس کرتے ہیں کہ مہاراجہ کا فیصلہ غلط تھا، پڑوسی ملک کے حالات اور وہاں کے لوگوں کی قسمت دیکھ کر ضرور شرمندہ ہوں گے۔
بی جے پی ترجمان نے کہا کہ الحاق کا دن جوش و خروش کے ساتھ منایا جانا چاہئے جیسا کہ اس دن تھا، جب مہاراجہ نے دباو¿ کے سامنے نہ جھک کر اپنی صلاحیت اور دور اندیشی کا مظاہرہ کیا اور بجائے اس کے کہ پاکستان پر ہندوستان کا انتخاب کیا۔
ٹھاکر نے کہا کہ پچھلے کئی سالوں سے دہشت گردی اور دھوکہ دہی کی سیاست سمیت متعدد چیلنجوں کے باوجود، جموں و کشمیر کے لوگ اب الحاق کے مکمل ثمرات سے لطف اندوز ہو رہے ہیں اور یو ٹی کے ہر کونے میں جمہوریت پھل پھول رہی ہے۔
بی جے پی ترجمان نے کہا ” الحاق کے فیصلے کو غلط قرار دینے والے آج پچھتا رہے ہوں گے کیونکہ پڑوسی ملک میں معاشی بدحالی، دیوالیہ پن اور غربت کے پیش نظر جموں و کشمیر کی قسمت بھارت کے ساتھ محفوظ ہے۔“
