وادی میں موسم خشک، صبح شام کے وقت سردی کی لہر تیز

سرینگر//
محکمہ موسمیات کی پیش گوئی کے عین مطابق وادی کشمیر میں گرچہ موسم خشک ہے تاہم صبح اور شام کے وقت سردی کی لہر میں تیزی محسوس کی جا رہی ہے ۔
موسمیات محکمے کے ایک ترجمان کے مطابق وادی میں ماہ رواں کے آخر تک موسم مجموعی طور پر خشک رہنے کا امکان ہے ۔
ترجمان نے کہا کہ اس دوران دن کے دجہ حرارت میں اضافہ درج ہو سکتا ہے تاہم شبانہ درجہ حرارت میں گراوٹ ہی متوقع ہے ۔
ادھر وادی میں شبانہ درجہ حرارت مسلسل معمول سے نیچے درج ہو رہا ہے ۔
دارلحکومت سرینگر میں کم سے کم درجہ حرارت۷ء۳ڈگری سینٹی گریڈ ریکارڈ کیا گیا جو معمول سے۱ء۰ڈگری سینٹی گریڈ کم ریکارڈ ہوا تھا۔
سیاحتی مقام گلمرگ میں کم سے کم درجہ حرارت۵ء۰ڈگری سینٹی گریڈ ریکارڈ کیا گیا جو معمول سے ۹ء۱ڈگری سینٹی گریڈ کم ریکارڈ ہوا تھا۔ایک اور سیاحتی مقام پہلگام میں کم سے کم درجہ حرارت۰ء۰ڈگری سینٹی گریڈ ریکارڈ کیا گیا جو معمول سے۵ء۰ڈگری سینٹی گریڈ کم ریکارڈ ہوا تھا۔
شمالی ضلع کپوارہ میں کم سے کم درجہ حرارت۲ء۳ڈگری سینٹی گریڈ ریکارڈ کیا گیا جو معمول کے عین مطابق درج ہوا تھا۔
قصبہ قاضی گنڈ میں کم سے کم درجہ حرارت۸ء۲ڈگری سینٹی گریڈ ریکارڈ کیا گیا جو معمول سے۷ء۰ڈگری سینٹی گریڈ کم ریکارڈ ہوا تھا۔
دریں اثنا وادی میں پیر کی صبح سے ہی موسم خشک رہا اور موسم خزاں کی نحیف دھوپ بھی چھائی رہی۔
لوگوں کو جہاں صبح اور شام کے وقت سردی سے بچنے کیلئے روایتی گرام لباس ’پھیرن‘ زیب تن کئے ہوئے اور روایتی کانگڑیوں کا استعمال کرتے ہوئے دیکھا جاتا ہے وہیں دن میں مختلف مقامات جیسے صحنوں، پارکوں اور دکان تھڑوں پر دھوپ سے لطف اندوز ہوتے ہوئے دیکھا جاسکتا ہے ۔