کٹھوعہ میں پاکستانی ڈرون نظر آنے کے بعد بڑے پیمانے پر تلاشی آپریشن شروع

جموں//
پاکستانی ڈورن نظر آنے کے بعد فوج اور دیگر سیکورٹی فورسز نے جموں و کشمیر کے ضلع کٹھوعہ میں بین الاقوامی سرحد پر کئی دیہات میں بڑے پیمانے پر تلاشی آپریشن شروع کر دیا ہے۔
پولیس ذرائع نے بتایا کہ کٹھوعہ کے ہیرا نگر علاقے میں بین الاقوامی سرحد کے نزدیک مقامی لوگوں نے پاکستانی ڈرون کی نقل و حرکت دیکھی۔انہوں نے کہا کہ ڈورن کے ذریعے اسلحہ ڈالنے کے شک پر سیکورٹی فورسز نے جمعے کو بین الاقوامی سرحد کے متصل کئی دیہات میں تلاشی آپریشن شروع کر دیا۔
معلوم ہوا ہے کہ ایل او سی کے نزدیک تالی گاوں کے لوگوں نے سیکورٹی فورسز کو اطلاع فراہم کی کہ انہوں نے جمعرات کی شام کو ایک ڈرون دیکھا۔ان کا کہنا تھا کہ علاقے میں تلاشی آپریشن جاری ہے تاہم فی الوقت سیکورٹی فورسز کو کوئی بھی شئی ہاتھ نہیں آئی ہے۔
دریں اثنا دفاعی ذرائع نے بتایا کہ جموں میں بین الاقوامی کنٹرول لائن کے نزدیکی علاقوں میں پاکستانی ڈرونز کی نقل وحرکت کے بعد سرحد پر ہائی الرٹ جاری کیا گیا ہے۔انہوں نے کہاکہ رہائشی علاقوں کے ساتھ ساتھ جنگلات میں بھی تلاشی آپریشن شروع کیا گیا۔