سرینگر/28 ستمبر
جموںکشمیر حکومت نے ایس ایس پی ٹریفک ہائی وے کو ٹرانسفر کرکے جموں وکشمیر پولیس ہیڈ کوارٹرز کے ساتھ منسلک کر دیا ہے ۔
حکومت کا اقدام وادی کشمیر کو ملک کے باقی حصوں کے ساتھ جوڑنے والی سری نگر- جموں قومی شاہراہ پر میوہ سے بھری ٹرکوں کو روکنے کے خلاف میوہ صنعت سے وابستہ تاجروں کے احتجاج کے بیچ سامنے آیا ہے ۔
فائنانشل کمشنر اور ایڈیشنل چیف سکریٹری راج کمار گوئل کے طرف سے جاری حکمنامے کے مطابق نیشنل ہائی وے کے ایس ایس پی ٹریفک شبیر احمد ملک کو ٹرانسفر کرکے جموں وکشمیر پولیس ہیڈ کوارٹرز کے ساتھ منسلک کر دیا گیا ہے اور اس عہدے کا اضافی چارج ایس پی رام بن موہت شرما کو اگلے احکامات تک سونپا گیا ہے ۔
بتادیں کہ فروٹ تاجروں کا کہنا ہے کہ ٹرکوں کو قومی شاہراہ پر روکنے سے انہیں بے تحاشا نقصان ہوا ہے ۔
وادی میں قومی شاہراہ پر میوہ سے لدی ٹرکوں کو روکنے کے خلاف جہاں اس صنعت سے وابستہ لوگوں نے احتجاج درج کیا وہیں سیاسی لیڈروں نے بھی آواز بلند کی۔
پی ڈی پی صدر اور سابق وزہر اعلیٰ محبوبہ مفتی نے گذشتہ روز شوپیاں منڈی میں تاجروں سے خطاب کے دوران سرکار کو انتباہ دیتے ہوئے کہا کہ اگر ٹرکوں کے لئے راستہ نہیں کھولا گیا تو قومی شاہراہ کو بلاک کیا جائے گا۔
