سرینگر/ 20ستمبر
جموں و کشمیر کے لیفٹیننٹ گورنر منوج سنہا نے منگل کو سری نگر میں کشمیر کے پہلے ملٹی پلیکس سنیما کا افتتاح کیا اور کہا کہ یو ٹی کے ہر ضلع میں جلد ہی 100 سیٹوں والے سنیما ہال ہوں گے۔
شہر کے سونہ وار علاقے میں پہلے ملٹی پلیکس سنیما کا افتتاح کرنے کے بعد اجتماع سے خطاب کرتے ہوئے ایل جی سنہا نے کہا کہ سنیما کے چاہنے والے کشمیر میں ہر جگہ موجود ہیں اور وادی میں سینما گھروں کی ایک عظیم تاریخ ہے۔ ان کاکہنا تھا”ایک وقت تھا جب لوگ بڑی تعداد میں دوستوں اور اہل خانہ کے ساتھ فلمیں دیکھنے آتے تھے“۔ ایل جی نے کہا کہ سینما گھر انہیں تفریح کے علاوہ بڑا سوچنے اور بڑے خواب دیکھنے کے مواقع فراہم کریں گے۔
سنہا نے کہا کہ 1965 میں بالی ووڈ کی ماضی کی بلاک بسٹر فلم ’جانور‘ جس میں مشہور بالی ووڈ اداکار شمی کپور نے کام کیا تھا، براڈوے سینما میں دکھایا گیا تھا۔ ایل جی نے کہا، ”کشمیر کے لیے کپور کی ایسی محبت تھی کہ اس نے اپنے خاندان کے افراد کو سری نگر کی ڈل جھیل میں اپنی آخری رسومات ادا کرنے کے لیے کہا تھا“۔
ایل جی نے کہا کہ کشمیری لوگ گزشتہ تین دہائیوں سے تفریح کے بھوکے ہیں اور آج پہلا ملٹی پلیکس وادی کے لوگوں کو آرام اور تفریح کا موقع فراہم کرے گا۔
سنہا کاکہنا تھا”پلوامہ اور شوپیاں اضلاع میں جلد ہی دو کثیر المقاصد سنیما ہال بن رہے ہیں۔ ہم جے اینڈ کے کے ہر ضلع میں 100 سیٹوں والے سنیما ہال قائم کرنے کا منصوبہ بنا رہے ہیں“۔
ایل جی نے کہا کہ سری نگر کسی زمانے میں تفریح کا مرکز تھا کیونکہ ضلع میں تقریباً آٹھ بڑے سینما گھر کام کرتے تھے‘ پیلیڈیم، ریگل، شیراز، نیلم، خیام، براڈوے، ناز اور فردوس۔ ”آج، ہم کھوئے ہوئے دور کو دوبارہ واپس لانے کی کوشش کر رہے ہیں۔ آج سنیما کا افتتاح جموں و کشمیر کی بدلتی ہوئی تصویر کی عکاسی کرتا ہے“۔
سنہا نے کہا کہ 5 اگست 2019 ایک تاریخی دن تھا جب ہندوستانی پارلیمنٹ نے ایک بڑا فیصلہ لیا تھا۔ انہوں نے کہا کہ دہلی کی حکومت جموں و کشمیر میں امن خریدنے کی کوشش نہیں کر رہی ہے بلکہ اسے مستقل طور پر قائم کرنے کی کوشش کر رہی ہے۔
نئی فلم پالیسی کے بارے میں، جے اینڈ کے ایل جی نے کہا کہ کشمیر میں حال ہی میں بہت سی فلموں کی شوٹنگ ہوئی ہے اور مزید کی توقع ہے۔ انہوں نے کہا کہ فلم سٹی بھی جلد ہی قائم کی جائے گی۔”ہم نئی فلم پالیسی کے تحت نوجوان فلمسازوں کو بہت زیادہ مراعات دیں گے تاکہ مقامی طور پر روزگار پیدا ہو“۔
ایل جی نے کہا کہ جن لوگوں نے برسوں جموں و کشمیر پر حکومت کی وہ اپنی تفریح کے لیے جموں و کشمیر سے باہر حتیٰ کہ بیرونی ممالک میں بھی اڑان بھرتے تھے جب کہ یہاں تفریح کے تمام ذرائع بند رہے۔
