بڈگام:وکیل کی لٹکتی ہوئی لاش درخت سے بر آمد

سرینگر//
وسطی کشمیر کے ضلع بڈگام کے آرتھ علاقے میں پیر کی صبح ایک۴۰سالہ جوان کو ایک درخت کے ساتھ لٹکا ہوا پایا گیا۔
ایک پولیس ترجمان نے اس واقعے کے مطابق اپنے ایک بیان میں تفصیلات فراہم کرتے ہوئے کہا کہ بڈگام کے آرتھ علاقے میں مقامی لوگوں نے ایک لاش دیکھی اور فوری طور پولیس کو اس بارے میں مطلع کیا۔
ترجمان نے کہا کہ اطلاع موصول ہوتے ہی پولیس اسٹیشن بڈگام کے ایس ایچ او اور چوکی افسر سویہ بگ کی سربراہی میں پولیس کی ایک ٹیم ایف ایس ایل کی ٹیم کے ساتھ جائے واردات پر پہنچی اور لاش کو طبی و قانونی لوازمات کی ادائیگی کے لئے اپنی تحویل میں لے لیا۔
متوفی کی شناخت۴۰سالہ طارق احمد میر ولد عبدالغنی میر ساکن وڈون بڈگام کے بطور ہوئی ہے ۔
معلوم ہوا ہے کہ متوفی پیشے کے لحاظ سے وکیل تھا۔پولیس نے اس سلسلے میں سی آر پی سی کی دفعہ۱۷۴کے تحت مزید کارروائیاں شروع کی ہیں۔