کانگریس کا جنتر منتر پر ہیمنت بسوا سرما کے خلاف احتجاج

نئی دہلی// کانگریس نے آسام کے وزیر اعلیٰ ہیمنت بسوا سرما کے خلاف بدعنوانی کا الزام لگاتے ہوئے آج یہاں احتجاج کیا اور کہا کہ ان کے خلاف جوسنگین معاملے ہیں کم از کم ان کی مرکزی تفتیشی بیورو (سی بی آئی) سے جانچ کرائی جانی چاہیے ۔
آسام کانگریس کے کئی سینئر لیڈروں نے کہا کہ مسٹر سرما بدعنوانی میں گلے تک ڈوبے ہوئے ہیں اور ان کے ذریعہ کی جا رہی بدعنوانی کی تحقیقات کی ضرورت ہے ۔ کانگریس کی ریلی میں شرکت کے ایک دن بعد اس مطالبے کے تعلق سے آسام کانگریس لیڈروں نے آج یہاں جنتر منتر پر مظاہرہ کیا۔
انہوں نے کہا کہ مسٹر بسوا سرما نے عوام سے جو وعدے کئے تھے وہ پورے نہیں ہو رہے ہیں۔ آسام کے لوگ مصیبت میں ہیں اور وہاں بدعنوانی اپنے عروج پر ہے ۔ انہوں نے کہا کہ آسام میں 25 لاکھ رجسٹرڈ بے روزگار ہیں اور حکومت کو ان کے لیے روزگار کا بندوبست کرنا چاہیے ۔
کانگریس کے کمیونیکیشن ڈپارٹمنٹ کے سربراہ جے رام رمیش نے اس بارے میں ٹویٹ کیا، "آسام کانگریس کے ساتھیوں نے آسام کے وزیر اعلی کے خلاف سات مخصوص معاملات کی سی بی آئی انکوائری کا مطالبہ کیا ہے ۔ ہیمنت بسوا سرما کو بی جے پی قیادت کا آشیرباد حاصل ہے ، لیکن ان کے خلاف پختہ ثبوت ہیں۔ کیا سی بی آئی کو اپنا کام کرنے دیا جائے گا؟”