ابوظہبی، 17 نومبر (یواین آئی)
وراٹ کوہلی کے بچپن کے کوچ راج کمار شرما نے کہا ہے کہ کوہلی نے اب تک دس اوور کا کرکٹ فارمیٹ نہیں کھیلا ہے، لیکن وہ ابوظہبی ٹی 10 ٹورنامنٹ پر نظر رکھے ہوئے ہیں۔ راج کمار شرما اس سیزن میں ٹی 10 کی ٹیم یونائیٹڈ ٹائیگرز کے ساتھ وابستہ ہیں۔ پیر کو زاید کرکٹ اسٹیڈیم میں ٹائیگرز کو اریبین ایسز کے ہاتھوں سات وکٹ سے شکست کے بعد شرما نے کہا، میں نے اسے بتایا تھا کہ میں وہاں جا رہا ہوں اور میری ذمہ داری کیا ہوگی۔
وہ اس ٹورنامنٹ کے بارے میں جانتا ہے اور مجھے معلوم ہے کہ وہ اسے دیکھ رہا ہے۔ شرما اپنے سابق شاگرد وراٹ کوہلی کو اس فارمیٹ میں کھیلتے ہوئے دیکھنا چاہیں گے۔
انہوں نے کہا، انہوں نے یہ فارمیٹ نہیں کھیلا ہے، لیکن اگر وہ کھیلتے ہیں تو اچھی کارکردگی کا مظاہرہ کریں گے اور لوگ بھی اسے پسند کریں گے۔ انہوں نے کہا، میں اس ذمہ داری سے لطف اندوز ہو رہا ہوں۔
ٹیم اچھی ہے، ماحول بہت اچھا ہے اور میں واقعی کافی پرجوش ہوں۔ شرما نے ‘ایک سابق کھلاڑی کی حیثیت سے میرا ماننا ہے کہ ٹیسٹ کرکٹ ہی اصل کرکٹ ہے۔ اگر کوئی ٹیسٹ کرکٹ میں اچھا ہے تو وہ ہمیشہ ون ڈے، ٹی 20 یا ٹی 10 بھی کھیل سکتا ہے۔
لیکن مجھے نہیں لگتا کہ ٹی 10 یا ٹی 20 کا کوئی کھلاڑی آسانی سے اچھا ٹیسٹ کھلاڑی بن سکتا ہے۔ اس کی کچھ مثالیں ضرور ہیں، لیکن تکنیکی اعتبار سے دونوں فارمیٹ الگ ہیں، کیونکہ ٹی 10 اور ٹی 20 میں زیادہ تر توجہ طاقت کے ساتھ بڑے شاٹس کھیلنے پر ہوتی ہے۔” کوہلی کے علاوہ شرما جس ہندوستانی کھلاڑی کو دس اوور کے فارمیٹ میں سب سے زیادہ کھیلتے دیکھنا چاہیں گے، وہ ابھیشیک شرما ہیں۔ انہوں نے کہا، ”اگر آپ ابھیشیک شرما اور ہماری ٹیم کے دیگر نوجوان کھلاڑیوں کو دیکھیں تو وہ بہت اچھے ہیں۔”








