ہندوستان کی سعودی عرب میں حملوں کی سخت مذمت، ایک ہندوستانی شہری ہلاک، تین زخمی

نئی دہلی، 22 اکتوبر (یو این آئی) ہندوستان نے سعودی عرب میں شہری اور توانائی کے مراکز پر ہونے والے حملوں کی سخت مذمت کرتے ہوئے انہیں ناقابلِ قبول قرار دیا ہے اور ان حملوں کو فوری طور پر روکنے کا مطالبہ کیا ہے۔
وزارتِ خارجہ نے جمعرات کو ایک بیان جاری کرتے ہوئے کہا کہ 21 اکتوبر کو دمام کے کنگ فہد بین الاقوامی ہوائی اڈے اور مشرقی صوبے میں واقع شیبہ آئل فیلڈ پر ہونے والے حملوں میں ایک ہندوستانی شہری کی موت ہو گئی، جبکہ تین دیگر زخمی ہو گئے۔
دمام ہوائی اڈے پر ہونے والے حملے میں ایک ہندوستانی شہری ہلاک اور دو زخمی ہوئے ہیں۔ وہیں، شیبہ آئل فیلڈ پر حملے میں ایک اور ہندوستانی شہری زخمی ہوا۔ ہندوستان نے متوفی کے اہلِ خانہ سے تعزیت کا اظہار کیا اور زخمیوں کی جلد صحت یابی کے لیے نیک خواہشات ظاہر کیں۔
وزارت نے کہا کہ ریاض میں واقع ہندوستانی سفارت خانہ سعودی حکام کے رابطے میں ہے اور متاثرہ ہندوستانی شہریوں کو ہر ممکن مدد فراہم کر رہا ہے۔
ہندوستان نے سعودی عرب کی خودمختاری کے تحفظ کے معاملے پر وہاں کی حکومت اور عوام کے ساتھ یکجہتی کا اظہار کیا اور امید ظاہر کی کہ خطے میں جلد امن اور معمول کے حالات بحال ہوں گے۔