ہندوستان 20 طلائی سمیت 80 تمغوں کے ساتھ چھٹے مقام پر

آئچی-ناگویا (جاپان)، 22 اکتوبر (یواین آئی) ایشین پیرا گیمز میں ہندوستان نے ایک اور شاندار دن گزارا۔ انجنا بین بمبڈیا نے خواتین کی 400 میٹر ٹی-47 میں طلائی اور ہم وطن جینتی بہرا نے چاندی کا تمغہ جیت کر ہندوستان کو پہلے دو مقامات دلائے، جبکہ تیجل بین ڈامور نے خواتین کی 400 میٹر ٹی-1 میں چاندی کا تمغہ حاصل کیا۔
سولئی راج دھرم راج نے مردوں کی لانگ جمپ میں 7.15 میٹر کے ایشیائی ریکارڈ کے ساتھ مسلسل دوسرا طلائی تمغہ جیتا۔ شیتل دیوی نے خواتین کے کمپاؤنڈ انفرادی اور تومن کمار کے ساتھ مکسڈ ٹیم مقابلے میں طلائی تمغے جیتے، جبکہ سُورنّا راج نے خواتین کے ڈسکس ایف-54 میں کامیابی حاصل کی۔
ہندوستانی پیرا ایتھلیٹس نے ایتھلیٹکس، تیراکی، تیر اندازی اور بیڈمنٹن میں تمغوں کی تعداد میں اضافہ جاری رکھا۔ دلیپ گاویت نے مردوں کی 400 میٹر ٹی-47 میں طلائی تمغہ جیتا، جبکہ ان کے ہم وطن بھاوِک کمار بھرواد کو فائنل سے نااہل قرار دیا گیا۔ روی کارتک بڈیگینا نے مردوں کی 200 میٹر ٹی-13 میں کانسہ حاصل کیا۔
پیرا بیڈمنٹن میں تھلسِمَتھی مروگیشن اور نتیش کمار مکسڈ ڈبلز ایس ایل-3-ایس یو-5 کے فائنل میں پہنچ گئے، جبکہ نوین شیوکمار نے مردوں کے سنگلز ایس ایل-4 کے فائنل میں جگہ بنائی۔ پرمود بھگت نے بھی تین گیم کے سنسنی خیز مقابلے میں کامیابی حاصل کرکے مردوں کے سنگلز فائنل میں جگہ پکی کرلی۔
ہندوستان نے دن کا اختتام 20 طلائی، 25 چاندی اور 37 کانسہ سمیت مجموعی طور پر 80 تمغوں کے ساتھ کیا اور مجموعی درجہ بندی میں چھٹے مقام پر رہا۔