بارہمولہ؍۲۲؍اکتوبر
بارہمولہ پولیس نے۵۲ راشٹریہ رائفلز کے ساتھ ایک مشترکہ کارروائی کے دوران دو مبینہ دہشت گرد معاونین کو گرفتار کرکے اسلحہ، دھماکہ خیز مواد اور نقد رقم برآمد کرنے کا دعویٰ کیا ہے۔
پولیس کے مطابق مصدقہ خفیہ اطلاعات کی بنیاد پر ضلع بارہمولہ کے ڈیلینہ علاقے میں درپورہ نرسری کے نزدیک کارروائی عمل میں لائی گئی، جس کے دوران دونوں مشتبہ افراد کو حراست میں لیا گیا۔
گرفتار افراد کی شناخت طاہر احمد ملک ولد محمد امین ملک اور وسیم سلطان بیگ ولد محمد سلطان بیگ، ساکنان چنکی پورہ سوپور، کے طور پر کی گئی ہے۔
پولیس کے مطابق کارروائی کے دوران ایک ترک ساختہ کینک پستول‘۱۰ کارتوسوں پر مشتمل ایک میگزین، تقریباً۱۵ کلوگرام اور ساڑھے۷کلوگرام وزنی دو دیسی ساختہ دھماکہ خیز آلات (آئی ای ڈیز)‘ ایک اسکوٹی اور۶۵۰۰ روپے نقد برآمد کیے گئے۔
پولیس کے مطابق ابتدائی تحقیقات سے شبہ ظاہر کیا گیا ہے کہ گرفتار افراد مبینہ طور پر دہشت گردوں کے معاونین کے طور پر کام کر رہے تھے اور دہشت گرد عناصر تک اسلحہ و دھماکہ خیز مواد پہنچانے یا ان کی نقل و حرکت میں سہولت فراہم کرنے میں ملوث ہو سکتے ہیں۔ تاہم، ان کے کردار اور مبینہ سرگرمیوں میں ملوث ہونے کی حد کا تعین کرنے کے لیے تحقیقات جاری ہیں۔
اس سلسلے میں متعلقہ قانونی دفعات کے تحت مقدمہ درج کرکے دونوں ملزمان کو گرفتار کر لیا گیا ہے۔
پولیس نے بتایا کہ مزید تحقیقات کے دوران ملزمان کے سابقہ اور دیگر روابط کا پتا لگانے، مبینہ نیٹ ورک میں شامل دوسرے افراد کی شناخت کرنے اور برآمد شدہ اسلحہ و دھماکہ خیز مواد کے ذرائع اور انہیں مطلوبہ مقام تک پہنچانے کے مقصد کا تعین کرنے کی کوشش کی جا رہی ہے۔
بارہمولہ پولیس نے دہشت گردی کے خلاف کارروائیاں جاری رکھنے اور مبینہ معاون نیٹ ورکس کو ختم کرنے کے عزم کا اعادہ کرتے ہوئے کہا کہ عوام کی حفاظت اور سلامتی کو یقینی بنانے کے لیے خفیہ اطلاعات کی بنیاد پر مشترکہ کارروائیاں جاری رہیں گی۔
اس دوران ہندواڑہ پولیس نے عوامی مقام پر ملک مخالف اور اشتعال انگیز پوسٹر چسپاں کرنے کے معاملے میں ایک ملزم کو گرفتار کیا ہے۔ اس سلسلے میں پولیس اسٹیشن ہندواڑہ میں ایک ایف آئی آردرج کرکے مزید تحقیقات شروع کر دی گئی ہے۔
پولیس کے مطابق، تحقیقات کے دوران اس سازش میں اوور گراؤنڈ ورکرز (او جی ڈبلیوز) اور دیگر افراد کے ممکنہ طور پر ملوث ہونے کا معاملہ سامنے آیا ہے۔ کیس میں ملوث دیگر افراد کی شناخت اور گرفتاری کے لیے کوششیں جاری ہیں۔
پولیس نے بتایا کہ معاملے سے جڑے پورے نیٹ ورک کا پتا لگانے اور اس جرم میں ملوث ہر شخص کے انفرادی کردار کا تعین کرنے کے لیے مزید تحقیقات کی جا رہی ہیں۔
ہندواڑہ پولیس نے امن و امان اور عوامی سلامتی برقرار رکھنے کے عزم کا اعادہ کرتے ہوئے کہا کہ غیر قانونی سرگرمیوں میں ملوث افراد کے خلاف قانون کے مطابق سخت کارروائی کی جائے گی۔
پولیس نے عام لوگوں سے اپیل کی ہے کہ وہ چوکس رہیں اور کسی بھی مشتبہ سرگرمی کی اطلاع قریبی پولیس اسٹیشن کو دے کر تعاون کریں۔
۔۔۔۔۔۔(ویب ڈیسک)
