مستقبل کے چیلنجوں سے نپٹنے کے لیے فوج کی تیاریوں کا خاکہ جاری کریں گے راج ناتھ

نئی دہلی، 21 اکتوبر (یو این آئی) وزیرِ دفاع راج ناتھ سنگھ بدھ کے روز سے شروع ہونے والی فوج کے ملٹری کمانڈروں کی تین روزہ کانفرنس میں ‘آرمی آپریٹیو ڈاکٹرائن جاری کریں گے جو جنگ کے بدلتے ہوئے طریقوں اور مستقبل کے تصادموں و چیلنجوں سے نپٹنے کے لیے ہندوستانی فوج کی تیاریوں کا خاکہ طے کرے گا۔
فوج کی اعلیٰ ترین سطح کی اس کانفرنس میں سینئر فوجی حکام سکیورٹی کی بدلتی ہوئی صورتحال، فوجی تیاریوں اور فوج کی صلاحیتوں میں اضافے سے متعلق امور پر تفصیلی تبادلۂ خیال کر رہے ہیں۔ کانفرنس سے وزیرِ دفاع راج ناتھ سنگھ خطاب کریں گے۔ چیف آف ڈیفنس اسٹاف (سی ڈی ایس)، چیف آف دی نیول اسٹاف (نیوی چیف) اور وزارتِ الیکٹرانکس و انفارمیشن ٹیکنالوجی کے سکریٹری بھی سلامتی سے متعلق موجودہ امور پر اپنے خیالات کا اظہار کریں گے۔
وزیرِ دفاع اقوامِ متحدہ سے متعلق سالانہ مجلے کا اجراء بھی کریں گے۔ اس کے ساتھ ہی، اقوامِ متحدہ کے امن مشن میں نمایاں خدمات انجام دینے والے ہندوستانی فوج کے جوانوں کو اعزاز سے بھی نوازیں گے۔ یہ اعزاز ان کے جذبۂ خدمت، پیشہ ورانہ مہارت اور بین الاقوامی امن و سلامتی میں اہم تعاون کے اعتراف میں دیا جائے گا۔
کانفرنس کے دوران آرمی چیف گرین ملٹری سینٹرز اور ایوی ایشن فلائٹ سیفٹی کے شعبے میں بہترین کارکردگی کا مظاہرہ کرنے والوں کو بھی ایوارڈز سے نوازیں گے۔ کانفرنس میں فوج کے موجودہ منصوبوں کا جائزہ لیا جائے گا اور مستقبل کی ترجیحات کا تعین کیا جائے گا، تاکہ فوج کو بدلتی ہوئی حالات و ضروریات کے مطابق مکمل طور پر تیار رکھا جا سکے۔