موبائل پر لائیو رہے گی حکومت؛ مرکزی وزیر شیو راج سنگھ چوہان نے کسانوں کو وقف کیا نیا پورٹل

نئی دہلی، 19 اکتوبر (یو این آئی) زراعت و کسانوں کی بہبودکے مرکزی وزیرِ شیو راج سنگھ چوہان نے پیر کے روز کسانوں تک سرکاری اسکیموں، مالی امداد اور کھیتی باڑی کی معلومات کو بغیر کسی پریشانی کے براہِ راست ان کے موبائل فون تک پہنچانے کے لیے ترمیم شدہ ایگری ویلفیئر پورٹل کا باقاعدہ افتتاح کیا۔
مسٹر چوہان نے اس موقع پر منعقدہ تقریب سے خطاب کرتے ہوئے کہا کہ اس پورٹل کے ذریعے اب کسانوں کو اسکیموں کی معلومات حاصل کرنے یا درخواست دینے کے لیے الگ الگ دفاتر اور ویب سائٹس کے چکر نہیں لگانے پڑیں گے۔ انہوں نے کہا کہ یہ پلیٹ فارم صرف کسانوں تک محدود نہیں رہے گا، بلکہ فارمر پروڈیوسر آرگنائزیشنز (ایف پی اوز)، پرائمری ایگری کلچرل کریڈٹ سوسائٹیز (پی اے سی ایس)، زرعی سائنسدانوں، محققین اور اسٹارٹ اپس کو بھی ایک ساتھ جوڑے گا۔
یہاں جاری ایک پریس ریلیز کے مطابق مسٹر چوہان نے حکام سے کہا کہ پورٹل کی کامیابی درست اور بروقت معلومات سے طے ہوگی۔ پورٹل پر ہر جانکاری کا مسلسل اپ ڈیٹ ہونا انتہائی ضروری ہے۔ اس کے ساتھ ہی زبان اور طریقۂ کار آسان ہو تاکہ عام کسان اسے آسانی سے سمجھیں اور چلا سکیں۔ کسانوں کو اسے چلانے کے لیے کرشی وگیان مرکزوں کے ذریعے تربیت بھی دی جائے گی۔
مرکزی وزیر نے بتایا کہ یہ پی ایم-کسان، ایگری اسٹیک اور پی ایم فصل بیمہ یوجنا جیسی بڑی پہلوں کے لیے بھی کام کرے گا۔ دیہی علاقوں کو مدِ نظر رکھ کر اسے عام اسمارٹ فون اور کمزور نیٹ ورک میں بھی آسانی سے کام کرنے کے قابل بنایا گیا ہے۔ انہوں نے کہا کہ یہ پورٹل وزیرِ اعظم نریندر مودی کے ‘ڈیجیٹل انڈیا’ اور کسانوں کی بہبود کے عزم کو آگے بڑھاتا ہے۔ مسٹر مودی کا واضح ویژن ہے کہ حکومت ہر وقت عام شہری اور کسان کے لیے موبائل پر لائیو رہے۔