جے شنکر اور مارکو روبیو کی 20 اکتوبر کو ممبئی میں ملاقات کی تصدیق

نئی دہلی، 17 اکتوبر (یواین آئی) وزارت خارجہ نے جمعہ کو تصدیق کی کہ وزیر خارجہ ایس جے شنکر 20 اکتوبر کو ممبئی میں امریکہ کے وزیر خارجہ مارکو روبیو سے ملاقات کریں گے۔ کانگریس لیڈر جے رام رمیش کی جانب سے مجوزہ ملاقات پر وزارت کی خاموشی اور امریکی فریق کی جانب سے تفصیلات سامنے آنے پر سوال اٹھائے جانے کے ایک دن بعد یہ تصدیق کی گئی۔
وزارت خارجہ کے ترجمان رندھیر جیسوال نے بتایا کہ جے شنکر 19 اور 20 اکتوبر کو ممبئی میں متحدہ عرب امارات کے نائب وزیر اعظم و وزیر خارجہ عبداللہ بن زاید النہیان اور امریکی وزیر خارجہ مارکو روبیو کی میزبانی کریں گے۔ انہوں نے کہا کہ روبیو کے دورے سے ہندوستان-امریکہ تعلقات کا جائزہ لینے اور جامع عالمی اسٹریٹجک شراکت داری کو مزید مضبوط بنانے کے طریقوں پر تبادلہ خیال کا موقع ملے گا۔
مسٹرجیسوال نے بتایا کہ جے شنکر اور عبداللہ بن زاید کے درمیان ملاقات میں دو طرفہ تعاون کے تمام پہلوؤں، مغربی ایشیا کی صورتحال اور عالمی و کثیر جہتی امور پر تبادلہ خیال ہوگا۔ توانائی، تجارت، سرمایہ کاری، فن ٹیک، دفاع اور کنیکٹیویٹی کے شعبوں میں تعاون کو بھی آگے بڑھایا جائے گا۔
مسٹر روبیو کے دورے کے حوالے سے وزارت نے کہا کہ بات چیت میں توانائی، تجارت، سرمایہ کاری، دفاع، اہم ابھرتی ہوئی ٹیکنالوجیز اور باہمی مفاد کے دیگر شعبے شامل ہوں گے۔ دونوں فریق علاقائی اور عالمی پیش رفت پر بھی تبادلہ خیال کریں گے۔ امریکی محکمہ خارجہ کے مطابق روبیو اگلے ہفتے ممبئی اور جام نگر کا دورہ کریں گے، جہاں توانائی کے شعبے میں تعاون بڑھانے کے امکانات پر بھی بات ہوگی۔
کانگریس کے جنرل سکریٹری جے رام رمیش نے ایکس پر کہا تھا کہ امریکی سفیر کی جانب سے روبیو کے دورے اور ہندوستانی حکام سے ملاقات کی مزید تفصیلات دی گئی ہیں، لیکن یہ بات قابل ذکر ہے کہ امریکی فریق نے جے شنکر کی بھی ملاقات میں شرکت کی توقع ظاہر کی تھی۔
ممبئی کو ملاقات کے مقام کے طور پر منتخب کرنے کے سوال پر مسٹر جیسوال نے کہا کہ ہندوستان گزشتہ تقریباً ایک دہائی سے غیر ملکی معززین کی میزبانی دہلی سے باہر بھی کرتا رہا ہے۔ انہوں نے اسپین کے وزیر اعظم کی بڑودہ، جرمن چانسلر فریڈرک مرز کی احمد آباد اور ماریشس کے وزیر اعظم کی وارانسی میں میزبانی کے علاوہ گوا میں ایس سی او وزرائے خارجہ اجلاس اور کیواڈیا میں بوٹسوانا کے وزیر خارجہ کی میزبانی کی مثالیں دیں۔