دراوڑ، گِلکرسٹ اور مورگن ممبئی انڈینز کے کوچ کی دوڑ سے باہر

ندوستان کے سابق کپتان راہل دراوڑ، ایڈم گلکرسٹ اور ایون مورگن ممبئی انڈینز (ایم آئی) کے ہیڈ کوچ کے عہدے کی دوڑ میں شامل نہیں ہیں۔
کرک بز کی رپورٹ کے مطابق مہیلہ جے وردھنے کے ممبئی انڈینز سے الگ ہونے کے بعد راہل دراوڑ کے پانچ بار کی چیمپئن ٹیم سے جڑنے کی قیاس آرائیاں تیز ہوگئی تھیں، لیکن انہوں نے خود کو اس دوڑ سے باہر کرلیا ہے اور کم از کم اگلے سیزن میں ٹیم کے ساتھ شامل نہیں ہوں گے۔ ایک ذرائع نے بتایا کہ دراوڑ اپنی فیملی اور اپنے بیٹوں (سُمت اور انوے) کے کیریئر پر توجہ دینا چاہتے ہیں۔
2026 کے سیزن سے قبل راجستھان رائلز سے الگ ہونے کے بعد دراوڑ کو کئی پیشکشیں ملی تھیں، لیکن انہوں نے آئی پی ایل میں ملنے والی بھاری رقم کی پیشکشیں قبول نہیں کیں۔ مستقبل میں ان کی واپسی کا امکان ہوسکتا ہے، لیکن اگلے سیزن میں ایسا نہیں ہوگا۔ آسٹریلیا کے ایڈم گلکرسٹ اور انگلینڈ کے ایون مورگن کے معاملے میں بھی یہی صورتحال ہے اور دونوں نے آئی پی ایل انتظامیہ کو اپنی عدم دستیابی سے آگاہ کردیا ہے۔
ابھی یہ واضح نہیں ہے کہ جے وردھنے کی جگہ کون لے گا۔ ممبئی انڈینز کے حکام نے جمعہ کی شام ملاقات کے بعد جے وردھنے سے الگ ہونے کا فیصلہ کیا۔ ان کا فرنچائز کے ساتھ معاہدہ جلد ختم ہونے والا تھا۔ جے وردھنے نے اس فرنچائز کے ساتھ دو مرتبہ ہیڈ کوچ کی ذمہ داری سنبھالی، پہلی بار 2017 سے 2022 اور پھر 2024 سے 2026 تک۔
ممبئی انڈینز کے موجودہ سپورٹ اسٹاف میں لستھ ملنگا اور پارس مہمبرے (گیندبازی)، کیرون پولارڈ (بلے بازی) اور کارل ہاپکنسن (فیلڈنگ) شامل ہیں۔ ان کے مستقبل کا فیصلہ نئے کوچ پر چھوڑا گیا ہے۔ ذرائع کے مطابق کوچ کے انتخاب کے لیے انٹرویو کا عمل جلد شروع ہوسکتا ہے۔
چنئی سپر کنگز سے حال ہی میں الگ ہونے والے مائیک ہسی نے کئی آئی پی ایل فرنچائزز سے رابطہ کیا ہے اور ممبئی انڈینز سے بھی بات چیت کا امکان ظاہر کیا جا رہا ہے۔ ہسی نے اسٹیفن فلیمنگ کے ساتھ انگلینڈ کے سیٹ اپ میں شامل ہونے کی پیشکش مسترد کردی ہے اور ممکنہ طور پر آسٹریلیا میں کسی کردار کی تلاش میں ہیں، تاہم وہ کسی آئی پی ایل ٹیم کے ساتھ بھی کام کرنے کے لیے تیار ہوسکتے ہیں۔
دیگر ممکنہ امیدواروں میں جنوبی افریقہ کے ایڈریان بیرل اور آسٹریلیا کے ایرون فنچ شامل ہیں۔ بیرل نے ایس 20 کے چار سیزن میں سن رائزرس ایسٹرن کیپ کو تین مرتبہ خطاب دلایا اور چار بار فائنل تک پہنچایا ہے۔ رواں سال کے آغاز میں انہوں نے ‘دی ہنڈریڈ میں سن رائزرس لیڈز ویمنز کو بھی فائنل تک پہنچایا تھا۔
بیرل آئی ایل ٹی20 میں شارجہ واریئرز کے ہیڈ کوچ بھی ہیں، تاہم فی الحال ان کے کسی آئی پی ایل فرنچائز سے جڑنے کے خواہشمند ہونے کے امکانات کم بتائے جا رہے ہیں۔ دوسری جانب آسٹریلیا کے سابق کپتان ایرون فنچ کے بارے میں کہا جا رہا ہے کہ انہوں نے کچھ آئی پی ایل ٹیموں سے بات چیت کی ہے، تاہم ممبئی انڈینز سے رابطے کی تصدیق نہیں ہوئی ہے۔ ہسی، بیرل اور فنچ تینوں کو کئی آئی پی ایل فرنچائزز ممکنہ امیدواروں کے طور پر دیکھ رہی ہیں۔