ریکھا گپتا نے 1,400 طالبات میں سائیکلیں تقسیم کیں

نئی دہلی، 16 اکتوبر (یو این آئی) دہلی کی وزیر اعلیٰ ریکھا گپتا نے جمعہ کے روز شاردیہ نوراتری کے موقع پر شالیمار باغ میں واقع ‘سی ایم شری اسکول میں کنیا پوجا کی اور مختلف سرکاری اسکولوں کی نویں جماعت میں زیرِ تعلیم تقریباً 1,400 طالبات میں سائیکلیں تقسیم کیں۔
اس موقع پر محترمہ گپتا نے کہا کہ کنیا پوجا صرف ایک مذہبی روایت نہیں ہے، بلکہ یہ بیٹیوں کے احترام، مساوات اور ان کی اہمیت کو تسلیم کرنے کا پیغام ہے۔ انہوں نے طالبات کے روشن مستقبل، خوشحالی اور کامیابی کی دعا بھی کی۔ انہوں نے کہا کہ ہندوستانی ثقافت میں بیٹیوں کو طاقت، علم، رحم دلی اور خوشحالی کی علامت مانا گیا ہے۔ کنیا پوجا کا جذبہ تبھی با معنی ہوگا جب بیٹیوں کو احترام کے ساتھ تعلیم، تحفظ، خود اعتمادی اور آگے بڑھنے کے مساوی مواقع ملیں گے۔ انہوں نے مزید کہا کہ بیٹیاں خاندان کا فخر ہونے کے ساتھ ساتھ معاشرے اور قوم کے مستقبل کا سنگِ بنیاد بھی ہیں۔ ان کی صلاحیتوں کو نکھارنے، خوابوں کو شرمندۂ تعبیر کرنے اور انہیں خود کفیل بنانے کے لیے خاندان، اسکول اور معاشرے کو مل کر کوششیں کرنی چاہئیں۔
وزیر اعلیٰ نے بتایا کہ دہلی حکومت کی ‘ودیا واہنی یوجنا کے تحت اب تک 28,000 سائیکلیں تقسیم کی جا چکی ہیں۔ حکومت کا ہدف اس اسکیم کے تحت کل 1.50 لاکھ سائیکلیں تقسیم کرنے کا ہے۔ انہوں نے کہا کہ سائیکل ملنے سے طالبات کو اسکول آنے جانے میں سہولت ہوگی اور آمدورفت سے متعلق مشکلات کم ہوں گی۔ اس سے انہیں اپنی تعلیم باقاعدگی سے جاری رکھنے اور تعلیمی اہداف حاصل کرنے میں حوصلہ افزائی ملے گی۔ نویں جماعت طالبات کے تعلیمی سفر کا ایک اہم مرحلہ ہے، اس لیے اس سطح پر ان کا اعتماد بڑھانا اور تعلیم کے لیے سازگار ماحول فراہم کرنا ضروری ہے۔
انہوں نے بیٹیوں کی تعلیم کو ترجیح دینے کی اپیل کرتے ہوئے کہا کہ والدین کو اسکول میں ان کی باقاعدہ حاضری کو یقینی بنانا چاہئے۔ وہیں اساتذہ اور اسکول کے سربراہان کی ذمہ داری صرف تعلیم دینے تک محدود نہیں ہے، بلکہ طالبات میں خود اعتمادی، قیادت کی صلاحیت اور اچھے اخلاق کو فروغ دینا بھی ہے۔ انہوں نے کہا کہ بیٹیوں کو بااختیار بنانا صرف حکومت یا اسکولوں کی ذمہ داری نہیں ہے، بلکہ خاندان اور معاشرے کے ہر فرد کو اس میں اپنا تعاون دینا چاہئے تاکہ کوئی بھی بیٹی تعلیم سے محروم نہ رہے اور اسے اپنی صلاحیتوں کے مطابق آگے بڑھنے کا موقع مل سکے۔