تلک کا آؤٹ ہونا میچ کا ‘ٹرننگ پوائنٹ رہا: سیمسن

حیدرآباد، 15 اکتوبر (یواین آئی) ہندوستانی اوپننگ بلے باز سنجو سیمسن کا ماننا ہے کہ چوتھے ٹی ٹوئنٹی میچ میں ویسٹ انڈیز کے خلاف تلک ورما کا آؤٹ ہونا میچ کا ٹرننگ پوائنٹ تھا۔
نئی تیار کی گئی پچ پر 248 رنز کا تعاقب کرتے ہوئے، ہندستان 12ویں اوور تک 130 رنوں پر 5 وکٹ گنوا چکا تھا، لیکن تلک اور نتیش کمار ریڈی نے ٹیم کو مقابلے میں بنائے رکھا۔ ان دونوں نے مل کر ایسی صورتحال پیدا کر دی تھی کہ 19 گیندوں پر 48 رنوں کی ضرورت تھی، تبھی روماریو شیفرڈ نے تلک کو آؤٹ کر دیا۔
ویسٹ انڈیز کے ہاتھوں 24 رنز سے ہارنے کے بعد سنجو سیمسن نے کہا، "میچ کا ٹرننگ پوائنٹ تب آیا جب تلک آؤٹ ہوئے۔ ہم اچھی طرح سے آگے بڑھ رہے تھے اور فی اوور 10-12 رنز آسانی سے بنا رہے تھے۔ ریڈی اور تلک دباؤ والی صورتحال میں بہت اچھی بلے بازی کر رہے تھے۔ مجھے لگتا ہے کہ اس لمحے تک ہم ہدف کا تعاقب کرنے کی پوزیشن میں تھے۔ پانچ وکٹ گرنے کے بعد اس طرح کا کنٹرول ہونا واقعی بہت بڑی بات ہے – دو نوجوان کرکٹرز نے دباؤ کو سنبھالا اور ویسٹ انڈیز کی بولنگ لائن اپ کا ڈٹ کر مقابلہ کیا۔”
اس سے پہلے، سیمسن نے خود 23 گیندوں میں 56 رنز بنا کر ٹیم کے لیے ایک مضبوط بنیاد تیار کی تھی۔
انہوں نے کہا، "جب آپ ہارنے والی ٹیم کی طرف ہوتے ہیں، تو آپ جو کچھ بھی کرتے ہیں اس کا احساس بالکل الگ ہوتا ہے، اس لیے اس وقت میں کافی مایوس ہوں۔ میں یقیناً جیتنا چاہتا تھا۔ مجھے بلے بازی کرنے میں بہت مزہ آیا۔ جب آپ اس طرح کے اسکور کا تعاقب کر رہے ہوتے ہیں، تو کوئی دوسرا خیال نہیں آتا – آپ کو بس اپنی سوجھ بوجھ اور اپنی طاقت پر بھروسہ کرنا ہوتا ہے اور میں نے بالکل ویسا ہی کیا۔ اس لیے مجھے اپنی اننگ میں مزہ تو آیا، لیکن کاش ہم جیت جاتے۔”
جب ان سے پوچھا گیا کہ کیا گیندبازی میں ہندوستان کو جسپریت بمراہ کی کمی کھل رہی ہے، تو سیمسن نے کہا، "جسپریت بمراہ کا کوئی متبادل نہیں ہے۔ وہ اپنی نسل کے ایک غیر معمولی گیندباز ہیں، اور ہم بہت خوش قسمت ہیں کہ وہ ہماری ٹیم میں ہیں۔ لیکن ہمارے پاس کچھ بہت اچھی نوجوان صلاحیتیں بھی ہیں۔ ارشدیپ سنگھ بہت اچھا کام کر رہے ہیں اور پچھلے کچھ میچوں میں پرنس یادو نے جس طرح سے گیندبازی کی ہے، وہ بھی کافی متاثر کن ہے۔ مجھے لگتا ہے کہ ہمارے پاس واقعی بہت اچھا ٹیلنٹ ہے۔ ہم انہیں جتنا زیادہ کھلائیں گے اور ان پر جتنا زیادہ بھروسہ دکھائیں گے، وہ اتنے ہی بہتر ہوتے جائیں گے۔”
سیریز کا فیصلہ کرنے والے پانچویں ٹی ٹوئنٹی میچ سے پہلے ہندوستان کے سامنے ایک اور مسئلہ آ کھڑا ہوا ہے۔ ہدف کا تعاقب کرتے ہوئے آخری اوور میں، شمار جوزف کی ایک شارٹ گیند ارشدیپ کے بائیں کندھے پر لگ گئی۔ وہ کافی درد میں دنظرآہے تھے، لیکن پھر بھی ایک اور گیند کا سامنا کرنے کے بعد وہ ‘ریٹائرڈ ہرٹ’ ہو کر میدان سے باہر چلے گئے۔
سیمسن نے بتایا، "ارشدیپ اپنے کندھے پر برف لگا رہے ہیں۔ امید ہے کہ وہ جلد ہی ٹھیک ہو جائیں گے۔”