منسکھ مانڈویہ وارانسی میں ‘فٹ انڈیا سنڈے آن سائیکل’ کے 94ویں ایڈیشن کی قیادت کریں گے

نئی دہلی/وارانسی، 10 اکتوبر (یواین آئی) فٹنس، نوجوانوں کو بااختیار بنانے اور منشیات سے پاک ہندوستان کا پیغام عام کرتے ہوئے ‘فٹ انڈیا سنڈے آن سائیکل کا 94واں ایڈیشن 11 اکتوبر 2026 کو وارانسی میں منعقد ہوگا۔ یہ پروگرام صبح 6 بجے نمو گھاٹ سے سمپورنانند سنسکرت یونیورسٹی کے دیکشا منڈپ تک کے راستے پر ہوگا۔ ‘نشے سے پاک نوجوان، وکست بھارت کے موضوع پر مبنی اس پروگرام میں نوجوان، فٹنس کے شائقین، عام شہری اور کھیلوں سے وابستہ شخصیات شرکت کریں گی۔ اس کا مقصد فعال طرز زندگی کو فروغ دینا اور نوجوانوں کو منشیات سے دور رہنے کی ترغیب دینا ہے۔
اس پروگرام میں شہری، نوجوان، فٹنس کے شائقین اور کھیلوں سے وابستہ افراد ایک ساتھ سائیکلنگ کو فعال طرز زندگی اپنانے کے ایک آسان، قابل رسائی اور پائیدار طریقے کے طور پر فروغ دیں گے۔ اجتماعی شرکت کے ذریعے اس پیغام کو مضبوط بنانے کی کوشش کی جائے گی کہ فٹنس روزمرہ زندگی کا عزم ہے اور کھیل و جسمانی سرگرمیاں صحت مند، مضبوط اور منشیات سے پاک ہندوستان کی تعمیر میں اہم کردار ادا کرسکتی ہیں۔
نوجوانوں کے امور و کھیل اور محنت و روزگار کے مرکزی وزیر ڈاکٹر منسکھ مانڈویہ پروگرام میں مہمان خصوصی کی حیثیت سے شرکت کریں گے۔ اس موقع پر 2026 کے آئچی-ناگویا ایشین گیمز میں ملک کا نام روشن کرنے والے کھلاڑی بھی موجود ہوں گے۔ پراچی چودھری نے خواتین کی 400 میٹر دوڑ میں کانسی کا تمغہ جیتا، جبکہ پارول چودھری نے خواتین کی 3000 میٹر اسٹیپل چیس اور 5000 میٹر مقابلوں میں دو کانسی کے تمغے حاصل کیے۔ جے کمار نے مکسڈ 4×400 میٹر ریلے میں چاندی اور مردوں کی 4×400 میٹر ریلے میں کانسی کا تمغہ جیتا، جبکہ راج کمار پال نے ہاکی ٹیم کے رکن کی حیثیت سے طلائی تمغہ حاصل کیا۔
ان کھلاڑیوں کی شرکت سے پروگرام میں کھیلوں کا ایک خاص پہلو شامل ہوگا اور نوجوان شرکا کو ان ایتھلیٹس سے جڑنے کا موقع ملے گا، جنہوں نے اعلیٰ ترین سطح کے مقابلوں میں ہندوستان کی نمائندگی کی ہے۔ ان کا سفر نظم و ضبط، لگن، باقاعدہ تربیت اور بہترین کارکردگی کے لیے عزم کی اہمیت کو اجاگر کرتا ہے، جو ‘سنڈے آن سائیکل’ کے پیغام سے ہم آہنگ ہیں۔