گروگرام، 9 اکتوبر (یواین آئی) بی ایم ڈبلیو گروپ انڈیا نے ڈی ایل ایف بی ایم ڈبلیو گولف کپ 2026 کے قومی فائنل کے فاتحین کا اعلان کردیا ہے۔ ممبئی کے انیش بھُجَلے نے کیٹیگری اے اور مرادآباد کے وکاس مہاجن نے کیٹیگری بی کا خطاب جیتا۔ دونوں مارچ 2027 میں جنوبی افریقہ میں ہونے والے بی ایم ڈبلیو گولف کپ ورلڈ فائنل میں ہندوستان کی نمائندگی کریں گے۔
بی ایم ڈبلیو گروپ انڈیا کے صدر اور چیف ایگزیکٹو افسر ہردیپ سنگھ برار نے کہا کہ بی ایم ڈبلیو گولف کپ صرف کھیل کی عمدگی کا جشن نہیں بلکہ بی ایم ڈبلیو کمیونٹی کے جذبے اور مضبوطی کا بھی مظہر ہے۔ اس سال ملک بھر سے 2,300 گولفرز نے حصہ لیا، جن میں سے 40 بہترین کھلاڑی قومی فائنل تک پہنچے۔
قومی فائنل کے لیے کھلاڑیوں نے چنئی، حیدرآباد، ممبئی، پونے، احمد آباد، دہلی، وڈودرا، جے پور، بنگلورو، لکھنؤ، پٹنہ، کولکاتا اور گروگرام میں منعقدہ علاقائی مقابلوں کے ذریعے کوالیفائی کیا تھا۔
فائنل میں انیش بھُجَلے نے 12 تک کے ہینڈی کیپ والی کیٹیگری اے، جبکہ وکاس مہاجن نے 13 سے 28 ہینڈی کیپ والی کیٹیگری بی کا خطاب جیتا۔ دونوں فاتح عالمی فائنل میں ٹیم انڈیا کی نمائندگی کرتے ہوئے مختلف ممالک کے بہترین گولفرز کا مقابلہ کریں گے۔
بی ایم ڈبلیو گولف کپ کا آغاز 25 سال قبل برطانیہ میں بی ایم ڈبلیو انویٹیشن ٹورنامنٹ کے طور پر ہوا تھا۔ اب یہ عالمی سیریز بن چکا ہے، جس میں 40 ممالک کے ایک لاکھ کھلاڑی اور تقریباً ایک ہزار کوالیفائنگ ٹورنامنٹ شامل ہیں۔
