سرینگر؍۹؍ اکتوبر
جموں و کشمیر میں جمعہ کے روز پیش آئے دو الگ الگ واقعات میں مرکزی صنعتی حفاظتی فورس (سی آئی ایس ایف) کے ایک اہلکار اور سرحدی حفاظتی فورس (بی ایس ایف) کے ایک اسسٹنٹ کمانڈنٹ کی موت واقع ہوگئی۔
حکام کے مطابق، دونوں واقعات کی تحقیقات شروع کردی گئی ہیں۔
ایک مقامی خبر رساں ادارے کے مطابق، ریاسی ضلع میں ڈیوٹی کے دوران گولی لگنے سے زخمی ہونے والے سی آئی ایس ایف اہلکار نے اسپتال میں دم توڑ دیا۔ اہلکار کی شناخت محمد مشتاق کے طور پر کی گئی ہے، جو ریاسی ضلع کے مری گاؤں کے رہنے والے تھے۔
حکام نے بتایا کہ گولی لگنے کے بعد زخمی اہلکار کو علاج کے لیے ضلع اسپتال ریاسی منتقل کیا گیا، جہاں وہ زخموں کی تاب نہ لاتے ہوئے چل بسے۔ واقعے کی وجوہات کا پتہ لگانے کے لیے تحقیقات شروع کردی گئی ہیں۔
دریں اثنا، شمالی کشمیر کے ضلع کپواڑہ کے دوبن علاقے میں بی ایس ایف کے ایک اسسٹنٹ کمانڈنٹ بے ہوشی کی حالت میں پائے گئے، جنہیں فوری طور پر طبی امداد کے لیے منتقل کیا گیا، تاہم ڈاکٹروں نے انہیں مردہ قرار دے دیا۔
(ایجنسیاں ) حکام کے مطابق، افسر کی موت کی اصل وجہ تاحال معلوم نہیں ہوسکی ہے۔ اس معاملے میں بھی تحقیقات شروع کردی گئی ہیں۔
