رکی پونٹنگ آسٹریلیا چیمپئنز کے مالک بنے، ڈیوڈ وارنر ڈبلیو سی ایل سیزن 3 کے کپتان منتخب

میلبورن، 8 ستمبر (یو این آئی) آسٹریلیا کے عظیم کرکٹر رکی پونٹنگ آسٹریلیا چیمپئنز فرنچائز کے مالک گروپ میں شامل ہوگئے ہیں، جبکہ جارح مزاج اوپنر ڈیوڈ وارنر کو ورلڈ چیمپئن شپ آف لیجنڈز (ڈبلیو سی ایل) کے سیزن 3 کے لیے آسٹریلیا چیمپئنز کا نیا کپتان مقرر کیا گیا ہے۔
میلبورن میں ڈبلیو سی ایل کی جانب سے منعقد پریس کانفرنس میں ’’آسٹریلیا چیمپئنز: اے نیو ایرا‘‘ کے تحت فرنچائز کے نئے دور کا اعلان کیا گیا۔ پونٹنگ کی شمولیت سے پونیت سنگھ کی قیادت والے مالک گروپ میں آسٹریلوی کرکٹ کی ایک اور عظیم شخصیت شامل ہوگئی ہے۔ فرنچائز نے ڈبلیو سی ایل سیزن 3 سے قبل اپنی نئی شناخت بھی پیش کی۔
ڈیوڈ وارنر کو آسٹریلیا چیمپئنز کے سب سے بڑے نئے کھلاڑی کے طور پر شامل کرنے کا اعلان کیا گیا ہے اور وہ ڈبلیو سی ایل کے تیسرے سیزن میں ٹیم کی قیادت کریں گے۔ ٹیم کا نیا روپ ایسے وقت میں سامنے آیا ہے جب ڈبلیو سی ایل سیزن 3 کو اب تک کا سب سے بڑا ٹورنامنٹ بنانے کی تیاری ہے، جس میں دنیا بھر کے شائقین کو مزید لیجنڈ کھلاڑی اور سخت مقابلے دیکھنے کو ملیں گے۔
پونٹنگ نے فرنچائز سے وابستہ ہونے پر خوشی کا اظہار کرتے ہوئے کہا کہ پونیت اور ٹیم کے ساتھ ساتھ وارنر کی قیادت میں آسٹریلوی کرکٹ شائقین کے لیے کچھ خاص بنانے کا بہترین موقع ہے۔ پونیت سنگھ نے کہا کہ پونٹنگ کی شمولیت اور وارنر کی کپتانی سے ٹیم کو تجربہ، قیادت اور طاقت ملے گی۔ وارنر نے بھی سیزن 3 میں آسٹریلیا چیمپئنز کی قیادت کرنے اور عظیم کھلاڑیوں کے ساتھ میدان میں واپسی پر جوش کا اظہار کیا۔