روہت کی ون ڈے ٹیم میں جگہ پر کوئی فوری خطرہ نہیں

ممبئی، 3 ستمبر (یو این آئی): بھارتی کرکٹ ٹیم کے سابق کپتان اور تجربہ کار بلے باز روہت شرما کی ون ڈے ٹیم میں جگہ کو فی الحال کوئی فوری خطرہ لاحق نہیں ہے۔ بھارتی کرکٹ کنٹرول بورڈ (بی سی سی آئی) کی جانب سے سامنے آنے والے اشاروں کے بعد ان قیاس آرائیوں میں کمی آئی ہے کہ روہت کو ون ڈے اسکواڈ سے باہر کیا جا سکتا ہے۔2027 کے ون ڈے ورلڈ کپ کو مدنظر رکھتے ہوئے روہت شرما کی دستیابی اور مستقبل کے کردار پر گزشتہ کچھ عرصے سے مختلف سوالات اٹھائے جا رہے تھے، تاہم بی سی سی آئی نے واضح کیا ہے کہ ان کی موجودہ پوزیشن میں فوری طور پر کوئی تبدیلی نہیں کی جا رہی۔بی سی سی آئی کے سکریٹری دیوجیت سائکیہ نے جمعرات کو ممبئی میں بورڈ کے ہیڈکوارٹر میں ہندوستانی ٹیم کی کارکردگی کا جائزہ لینے کے بعد روہت کی حالیہ کارکردگی کا حوالہ دیتے ہوئے کہا کہ وہ عمدہ کرکٹ کھیل رہے ہیں۔ ان کے اس بیان سے یہ اشارہ ملا ہے کہ بورڈ فی الحال روہت شرما کے تجربے اور کارکردگی سے مطمئن ہے۔ٹیم کی کارکردگی کا جائزہ لینے کے لیے منعقدہ اجلاس میں ہندوستانی ٹیم کے دونوں کپتان شبھمن گل اور شریئس ایئر کے علاوہ ہیڈ کوچ گوتم گمبھیر اور کرکٹ آپریشنز سے وابستہ وی وی ایس لکشمن بھی شریک ہوئے۔ سلیکشن کمیٹی کے چیئرمین اجیت اگرکر اجلاس میں موجود نہیں تھے۔ بتایا گیا کہ وہ ممبئی سے باہر تھے اور ممکنہ طور پر ایسی جگہ پر تھے جہاں انٹرنیٹ کی سہولت دستیاب نہیں تھی۔اجلاس کے دوران وی وی ایس لکشمن کو کرکٹ ڈائریکٹر جیسے کسی نئے عہدے پر تعینات کیے جانے سے متعلق قیاس آرائیوں کو بھی بی سی سی آئی سکریٹری نے مسترد کر دیا۔ انہوں نے سلیکشن کمیٹی میں بھی فوری طور پر کسی تبدیلی کے امکان کو خارج کردیا۔اجیت اگرکر کی اجلاس میں عدم شرکت کے باعث سلیکشن کمیٹی کے مستقبل کے حوالے سے قیاس آرائیاں اگرچہ جاری رہ سکتی ہیں، تاہم بی سی سی آئی کے تازہ موقف سے یہ واضح ہوتا ہے کہ فی الحال روہت شرما کی ون ڈے پوزیشن میں کسی فوری تبدیلی کا منصوبہ نہیں ہے۔روہت شرما کی موجودہ فارم اور مستقبل میں ان کے کردار پر نظر رکھنے کے ساتھ ساتھ 2027 ورلڈ کپ کے لیے ہندوستانی ٹیم کی تشکیل بھی بی سی سی آئی اور سلیکٹرز کے لیے اہم معاملہ رہے گی۔