لارڈز ٹیسٹ میں بابر اعظم کی واپسی متوقع

لندن، 26 اگست (یو این آئی) انگلیند کے خلاف پہلے آئی سی سی ورلڈ ٹیسٹ چیمپئن شپ میچ میں انگلی کی چوٹ کے باعث باہر رہنے والے پاکستان کے ٹیسٹ کپتان بابر اعظم جمعرات سے شروع ہونے والے لارڈز ٹیسٹ میں واپسی کے لیے تیار ہیں۔
بابر اعظم نے منگل کو لارڈز میں نیٹ پریکٹس کے دوران بیٹنگ کی، جس کے بعد پاکستان کے بولنگ کوچ عمر گل نے بھی ان کی دوسرے ٹیسٹ میں واپسی کی امید ظاہر کی۔
عمر گل نے کہا کہ بابر نے نیٹ میں تیز گیندبازوں، اسپنرز اور تھرو ڈاؤنز کا سامنا کیا اور مکمل بیٹنگ سیشن کیا۔ ان کے مطابق بابر اچھی فارم میں دکھائی دیے اور امید ہے کہ وہ لارڈز ٹیسٹ کے لیے دستیاب ہوں گے۔
آئی سی سی کے مطابق بابر نے ویسٹ انڈیز کے خلاف گزشتہ سیریز میں پاکستان کی جانب سے سب سے زیادہ 193 رنز بنائے تھے، جس میں دو نصف سنچریاں شامل تھیں۔ انگلینڈ میں انہوں نے چھ اننگز میں تین نصف سنچریاں بنائی ہیں اور ان کی اوسط 65.75 رہی ہے۔ انگلینڈ کے خلاف 14 اننگز میں ان کی اوسط 53.83 ہے، جس میں چھ نصف سنچریاں اور ایک سنچری شامل ہے۔
بابر اعظم کی واپسی سے پاکستان کی ٹیم کو مزید مضبوطی مل سکتی ہے۔ پاکستانی ٹیم کو ہیڈنگلے میں کھیلے گئے پہلے ٹیسٹ میں اننگز اور 103 رنز سے بڑی شکست کا سامنا کرنا پڑا تھا۔