تلنگانہ آٹھویں کھیلو انڈیا یوتھ گیمز کی میزبانی کرے گا

نئی دہلی/حیدرآباد، 26 اگست (یو این آئی) تلنگانہ رواں سال آٹھویں کھیلو انڈیا یوتھ گیمز کی میزبانی کرے گا۔ مقابلے حیدرآباد، ورنگل، کریم نگر اور محبوب نگر میں منعقد کیے جائیں گے۔
مرکز کے مطابق تقریباً 6 ہزار کھلاڑی 25 کھیلوں میں حصہ لیں گے۔ تلنگانہ کو ایک مقامی کھیل شامل کرنے کی تجویز دینے کا اختیار بھی ہوگا، جبکہ اس ایڈیشن میں ایک نئے کھیل کو بھی شامل کیا جائے گا۔ مرکز نے کھیلوں کے انعقاد کے لیے 22 کروڑ روپے جاری کیے ہیں۔
کوئلہ و کان کنی کے مرکزی وزیر جی کشن ریڈی نے تلنگانہ کو میزبان ریاست منتخب کیے جانے کا خیرمقدم کرتے ہوئے کہا کہ کھیلو انڈیا پروگرام زمینی سطح پر کھیلوں میں باصلاحیت کھلاڑیوں کی شناخت اور انہیں پروان چڑھانے میں اہم کردار ادا کررہا ہے۔
انہوں نے بتایا کہ تلنگانہ میں کھیلو انڈیا کے تحت کھیلوں کی سہولتوں پر تقریباً 30 کروڑ روپے خرچ کیے گئے ہیں، جن میں عثمانیہ یونیورسٹی کے لیے 11.5 کروڑ اور مختلف شہروں میں بنیادی ڈھانچے کے لیے 18.5 کروڑ روپے شامل ہیں۔ ریاست میں 33 کھیلو انڈیا مراکز بھی قائم کیے گئے ہیں، جبکہ نیشنل اسپورٹس ڈیولپمنٹ فنڈ کے تحت 8.5 کروڑ روپے دیے گئے ہیں۔
ریڈی نے بتایا کہ قومی کھیل بجٹ 2014 سے قبل 1,219 کروڑ روپے سے بڑھ کر 2025-26 میں 3,794 کروڑ روپے ہوگیا ہے، جبکہ کھیلوں کے بنیادی ڈھانچے سے متعلق منصوبوں کی تعداد گزشتہ 12 برس میں 38 سے بڑھ کر 350 ہوگئی ہے۔
انہوں نے تلنگانہ کی باکسر نکہت زرین اور بیڈمنٹن کھلاڑی پی وی سندھو کو مرکزی کھیل پروگراموں سے فائدہ اٹھانے والی نمایاں کھلاڑیوں کے طور پر پیش کیا۔
قومی کھیل دن کی تقریبات کے تحت ’کھیلو انڈیا سمواد – کھیل کی بات، پی ایم کے ساتھ‘ 27 اگست کو ملک بھر کے 1,500 سے زیادہ کالجوں میں منعقد ہوگا۔ وزیراعظم نریندر مودی طلبہ سے کھیل، فٹنس اور نوجوانوں کی قیادت میں ملک کی تعمیر جیسے موضوعات پر ورچوئل بات چیت کریں گے۔