سرینگر؍۲۶؍اگست
سرینگر کی ہائی سکیورٹی سینٹرل جیل سے فرار ہونے کے تین روز بعد الگ الگ پوکسو مقدمات میں زیرِ سماعت دو قیدیوں کو سری نگر پولیس نے بدھ کے روز راجستھان میں گرفتار کرلیا۔
ایک سرکاری عہدیدار نے بتایا کہ راجستھان کے سدن پورہ علاقے کے فرمان خان اور جنوبی کشمیر کے اننت ناگ ضلع کے سنگلن چترگل کے مختار احمد گجر۲۳؍ اگست کو سری نگر سینٹرل جیل کی سامنے والی دیوار پھلانگ کر فرار ہوگئے تھے۔
عہدیدار کے مطابق دونوں کو سری نگر پولیس نے راجستھان پولیس کی مدد سے ضلع چورو کے راج گڑھ علاقے سے تلاش کرکے گرفتار کرلیا۔انہوں نے کہا کہ ضروری قانونی کارروائی مکمل کرنے کے بعد دونوں ملزمان کو مزید قانونی کارروائی کے لیے سری نگر لایا جائے گا۔
فرمان خان کو۲۳ جون سے سری نگر سینٹرل جیل میں رکھا گیا تھا۔ اس کے خلاف بھارتیہ نیائے سنہتا (بی این ایس) اور بچوں کو جنسی جرائم سے تحفظ کے قانون (پوکسو) کی مختلف دفعات کے تحت مقدمہ درج ہے۔
اسی طرح مختار احمد گجر۱۳؍ اپریل سے جیل میں بند تھا اور اس کے خلاف بھی بی این ایس اور پوکسو ایکٹ کی مختلف دفعات کے تحت الگ مقدمہ درج ہے۔
دونوں کے جیل سے فرار ہونے کے بعد سری نگر پولیس نے ان کی تلاش اور گرفتاری کے لیے بڑے پیمانے پر کارروائی شروع کی تھی۔ پولیس نے دونوں کی گرفتاری میں مدد دینے والی معلومات فراہم کرنے والوں کے لیے انعام کا اعلان کرنے کے ساتھ ساتھ لک آؤٹ نوٹس بھی جاری کیے تھے۔ (ایجنسیاں)
۔۔۔۔۔۔۔
ایجنسیاں
