ساتوک-چراغ باہر، تریسا-گایتری کا تمغہ یقینی

نئی دہلی، 21 اگست (یو این آئی) بیڈمنٹن ورلڈ چیمپئن شپ میں ہندوستان کے لیے ملے جلے نتائج رہے۔ مردوں کی ٹاپ ڈبلز جوڑی ساتوک سائراج رنکی ریڈی اور چراغ شیٹی کو کوارٹر فائنل میں شکست کا سامنا کرنا پڑا جبکہ تریسا جولی اور گایتری گوپی چند نے شاندار واپسی کرتے ہوئے سیمی فائنل میں جگہ بنالی اور خواتین ڈبلز میں ہندوستان کا تاریخی تمغہ یقینی بنا دیا۔
ساتوک اور چراغ کو چین کی عالمی نمبر تین جوڑی لیانگ وی کینگ اور وانگ چانگ نے صرف 36 منٹ میں 21-18، 21-9 سے شکست دی۔ عالمی نمبر پانچ بھارتی جوڑی نے 2022 اور 2025 کی عالمی چیمپئن شپ میں کانسے کے تمغے جیتے تھے، لیکن تیسرا تمغہ حاصل کرنے کی ان کی امیدیں کوارٹر فائنل میں ہی ختم ہوگئیں۔
دوسری جانب تریسا اور گایتری نے خواتین ڈبلز کے کوارٹر فائنل میں چین کی جیا یی فان اور ژانگ شو شیان کو 16-21، 21-15، 21-13 سے شکست دی۔ چینی جوڑی کے خلاف گزشتہ تینوں مقابلے ہارنے کے باوجود ہندوستانی جوڑی نے ایک گھنٹہ نو منٹ تک جاری رہنے والے سخت مقابلے میں شاندار واپسی کی۔
پہلے گیم میں جیا اور ژانگ نے 6-1 کی برتری بنائی اور 11-8 کی برتری کے ساتھ وقفے تک پہنچیں۔ ٹریسا اور گایتری نے واپسی کی کوشش کی، لیکن چینی جوڑی نے 21-16 سے پہلا گیم اپنے نام کرلیا۔
دوسرے گیم میں بھی چین نے 5-1 کی برتری حاصل کی اور اسکور 10-7 تک پہنچا دیا، لیکن اس کے بعد ہندوستانی کھلاڑیوں نے کھیل کا رخ بدل دیا۔ انہوں نے حملوں کی رفتار بڑھائی اور نیٹ پر جارحانہ کھیل پیش کرتے ہوئے 13-10 کی برتری حاصل کرلی۔ چین نے اسکور 15-14 تک پہنچایا، لیکن تریسا اور گایتری نے مسلسل پانچ پوائنٹس جیت کر 19-14 کی برتری بنائی اور دوسرا گیم 21-15 سے جیت کر مقابلہ برابر کردیا۔
فیصلہ کن گیم میں ہندوستانی جوڑی نے شاندار شروعات کرتے ہوئے 11-5 کی برتری حاصل کی۔ سائیڈ بدلنے کے بعد بھی انہوں نے دباؤ برقرار رکھا اور اسکور 17-9 تک پہنچا دیا۔ گایتری نے تیز فلیٹ ایکسچینجز میں مؤثر کھیل دکھایا، جبکہ چینی جوڑی نے کئی غیر ضروری غلطیاں کیں۔ ہندوستان نے فیصلہ کن گیم 21-13 سے جیت کر سیمی فائنل میں جگہ پکی کرلی۔
اس کامیابی کے ساتھ خواتین ڈبلز میں ہندوستان کا 2011 کے بعد پہلا عالمی چیمپئن شپ تمغہ یقینی ہوگیا۔ آخری مرتبہ جوالا گٹا اور اشونی پونپا نے 2011 میں لندن میں کانسے کا تمغہ جیتا تھا۔
تریسا اور گایتری کے لیے یہ کامیابی خاص طور پر اہم ہے کیونکہ تریسا کی انجری کے بعد واپسی کا سفر آسان نہیں رہا۔ انہوں نے انڈونیشیا اوپن سے واپسی کی، اس کے بعد یو ایس اوپن میں حصہ لیا اور رواں ماہ فلپائن انٹرنیشنل چیلنج کا خطاب بھی جیتا۔ 2022 کامن ویلتھ گیمز میں کانسے کا تمغہ جیتنے والی یہ جوڑی 2025 کے آغاز میں عالمی ٹاپ 10 میں بھی شامل ہوئی تھی۔
اب تریسا اور گایتری کی نظریں سیمی فائنل میں کامیابی حاصل کرکے عالمی چیمپئن شپ کے فائنل میں جگہ بنانے پر ہیں۔