مونٹی دیسائی کینیڈا کی ٹیم کے ہیڈ کوچ کے عہدے سے مستعفی

ٹورنٹو، 20 اگست (یواین آئی) مونٹی ڈیسائی نے گزشتہ ہفتے کے آخر میں کینیڈا کی مردوں کی کرکٹ ٹیم کے ہیڈ کوچ کے عہدے سے استعفیٰ دے دیا، جس کے بعد کرکٹ کینیڈا نے نئے ہیڈ کوچ کی تقرری کے لیے درخواستیں طلب کرلی ہیںمسٹر دیسائی نے مئی میں کینیڈا کی ٹیم کی ذمہ داری سنبھالی تھی اور ان کی کوچنگ میں ٹیم نے آئی سی سی کرکٹ ورلڈ کپ لیگ 2 کی دو سہ فریقی سیریز میں حصہ لیا، جن میں سے ایک کینیڈا اور دوسری اسکاٹ لینڈ میں کھیلی گئی۔
کرکٹ کینیڈا 28 اگست تک ہیڈ کوچ کے عہدے کے لیے درخواستیں قبول کرے گا۔ ٹیم کی لیگ 2 کی اگلی سیریز 9 اکتوبر سے عمان میں شروع ہوگی، جہاں اسے عمان اور نیپال کے خلاف میچ کھیلنے ہیں۔
مونٹی دیسائی نے انسٹاگرام پر لکھا کہ کینیڈا کے عبوری ہیڈ کوچ کی حیثیت سے گزشتہ تین ماہ ان کے لیے مختصر لیکن اہم تجربہ رہے۔ انہوں نے کھلاڑیوں، سپورٹ اسٹاف اور کرکٹ کینیڈا کا شکریہ ادا کرتے ہوئے کہا کہ اس دوران انہیں بہت کچھ سیکھنے کو ملا۔
کینیڈا اس وقت لیگ 2 کی پوائنٹس ٹیبل میں چھٹے نمبر پر ہے اور اس کے چار میچ باقی ہیں۔ ٹیبل کی سرفہرست چار ٹیمیں اگلے سال ہونے والے ون ڈے ورلڈ کپ کوالیفائر میں جگہ بنائیں گی۔
کینیڈا کے ساتھ مسٹ دیسائی کا یہ دوسرا دور تھا۔ وہ اس سے قبل 2019 میں بھی ٹیم کے ساتھ کام کرچکے ہیں۔
ان کی رخصتی ایسے وقت میں ہوئی ہے جب کینیڈین کرکٹ انتظامی اور دیگر مسائل سے گزر رہی ہے۔ مسٹر دیسائی نے فروری-مارچ میں ٹی20 ورلڈ کپ میں کینیڈا کی تمام چار میچوں میں شکست کے بعد ٹیم کی ذمہ داری سنبھالی تھی۔ اس کے بعد آئی سی سی کی اینٹی کرپشن یونٹ نے نیوزی لینڈ کے خلاف کینیڈا کے میچ سے متعلق بدعنوانی کے الزامات کی تحقیقات شروع کیں۔
اس کے علاوہ آئی سی سی نے کرکٹ کینیڈا کی جانب سے رکنیت کی ذمہ داریوں کی سنگین خلاف ورزیوں کے بعد مئی میں اس کی فنڈنگ معطل کردی تھی۔ بعد میں آئی سی سی نے کینیڈا کی ایسوسی ایٹ رکنیت بھی معطل کردی۔ کرکٹ کینیڈا کا بورڈ اب بھی معطلی کا شکار ہے اور آئی سی سی نے رکنیت کی بحالی کے لیے کچھ شرائط مقرر کی ہیں۔