آئی سی سی نے قذافی اسٹیڈیم کی پچ سے ڈی میرٹ پوائنٹ ہٹا دیا

دبئی، 20 اگست (یو این آئی) انٹرنیشنل کرکٹ کونسل (آئی سی سی) نے جون میں کھیلے گئے میچوں سے متعلق پچ ریٹنگ کے خلاف پاکستان کرکٹ بورڈ (پی سی بی) اور کرکٹ کینیڈا کی جانب سے دائر تین اپیلوں کا جائزہ لینے کے بعد قذافی اسٹیڈیم سمیت دو پچوں کے ریکارڈ سے ڈی میرٹ پوائنٹس ہٹا دیے ہیں۔
آئی سی سی اپیل پینل نے میچ کی ویڈیو، میچ ریفری کی رپورٹ اور متعلقہ ٹیموں کے کپتانوں کے سرکاری تبصروں کا جائزہ لینے کے بعد یہ فیصلہ سنایا۔ 4 جون کو پاکستان اور آسٹریلیا کے درمیان تیسرے ون ڈے کے لیے لاہور کے قذافی اسٹیڈیم کی پچ کو ’غیر تسلی بخش‘ قرار دے کر ایک ڈی میرٹ پوائنٹ دیا گیا تھا، جسے اب ہٹا دیا گیا ہے۔ پینل نے کہا کہ پچ پر ضرورت سے زیادہ ناہمواری یا اسپن نہیں دیکھی گئی۔
ٹورنٹو کے میپل لیف کرکٹ گراؤنڈ کو 8 جون کو امریکہ اور نیدرلینڈز کے درمیان آئی سی سی مینز کرکٹ ورلڈ کپ لیگ 2 کے میچ کے لیے ’غیر تسلی بخش‘ قرار دیا گیا تھا، جبکہ 16 جون کو کینیڈا اور نیدرلینڈز کے درمیان میچ کے لیے اسے ’ناقص‘ قرار دیا گیا تھا۔
8 جون کے میچ سے متعلق ڈی میرٹ پوائنٹ بھی ہٹا دیا گیا ہے۔ اپیل پینل کے مطابق پچ کی سطح اطمینان بخش تھی اور اس میں ضرورت سے زیادہ ناہمواری، سیم موومنٹ یا اسپن نہیں دیکھی گئی۔
تاہم 16 جون کو پچ کو ’ناقص‘ قرار دیے جانے پر عائد تین ڈی میرٹ پوائنٹس برقرار رہیں گے۔ پینل نے کہا کہ اس موقع پر پچ کی حالت خطرناک تھی اور ناقص پچ کے معیار پر پوری اترتی تھی۔
ان فیصلوں کے بعد میپل لیف کرکٹ گراؤنڈ کے کھاتے میں تین ڈی میرٹ پوائنٹس باقی ہیں، جبکہ قذافی اسٹیڈیم کے کھاتے میں اب کوئی ڈی میرٹ پوائنٹ نہیں ہے۔