لکھائی اور پرنٹنگ کے کاغذ کی صنعت میں رواں سال منافع بڑھنے کی توقع: کرِسل

نئی دہلی، 19 اگست (یواین آئی) خام مال کی دستیابی میں اضافے کے باعث لکھائی اور پرنٹنگ کے کاغذ کی صنعت میں موجودہ مالی سال 2026-27 کے دوران منافع میں اضافے کی توقع ہے۔
کریڈٹ ریٹنگ اور مارکیٹ اسٹڈی کمپنی کرِسل نے منگل کو جاری ایک پریس ریلیز میں کہا کہ رواں مالی سال آپریٹنگ منافع میں تقریباً 150 بیسس پوائنٹس (1.5 فیصد) کا اضافہ ہونے کا امکان ہے۔ اس کی بڑی وجہ وبا کے بعد لگائے گئے ہارڈ ووڈ (سخت لکڑی) کے باغات کا وہ چکر ہے جو اب کٹائی کے لیے تیار ہو چکے ہیں۔ اس سے صنعت کے لیے اہم خام مال کی لاگت کم ہونے کی توقع ہے۔
اس کے علاوہ کمپنیاں کارکردگی بہتر بنانے کے لیے سرمایہ کاری کر رہی ہیں تاکہ منافع میں اضافہ ہو سکے۔ کرِسل کے مطابق بڑھتی ہوئی ڈیجیٹلائزیشن کے باعث کمپنیاں پیداواری صلاحیت بڑھانے کے لیے سرمایہ خرچ کرنے سے گریز کر رہی ہیں۔ یہ تجزیہ لکھائی اور پرنٹنگ کا کاغذ تیار کرنے والی 13 کمپنیوں کی بنیاد پر کیا گیا ہے، جو اس صنعت کی تقریباً 70 فیصد آمدنی کی نمائندگی کرتی ہیں۔
کرِسل ریٹنگز کے ڈائریکٹر شونک چکرورتی نے کہا کہ اس سال منافع میں بہتری صرف قیمتوں میں اضافے کی وجہ سے نہیں ہوگی بلکہ سازگار ہارڈ ووڈ سائیکل اس کی ایک بڑی وجہ ہوگا۔ چونکہ کاغذ کی لُگدی کی لاگت میں لکڑی کا اہم حصہ ہوتا ہے اور یہ آپریٹنگ لاگت کا تقریباً 50 سے 55 فیصد ہے، اس لیے کم قیمت پر لکڑی کی بڑھتی ہوئی دستیابی براہِ راست منافع کے تناسب میں اضافہ کرے گی۔
انہوں نے کہا کہ بہتر پروسیس کنٹرول کے ساتھ آپریٹنگ منافع رواں مالی سال میں تقریباً 13.5 فیصد تک پہنچ سکتا ہے، جو گزشتہ مالی سال میں تقریباً 12 فیصد تھا۔
پریس ریلیز میں کہا گیا ہے کہ کاغذ کی فی یونٹ قیمت میں بھی تقریباً 2 سے 3 فیصد اضافے کی توقع ہے۔ درآمد شدہ کاغذ کی قیمتوں میں اضافے سے کمپنیوں کو قیمتیں بڑھانے میں مدد ملے گی۔ زیادہ مال برداری کے اخراجات اور روپے کی قدر میں کمی کے باعث درآمد شدہ کاغذ مہنگا ہوا ہے۔
کوچنگ اداروں سمیت تعلیمی شعبے میں کاغذ کے استعمال اور بینکاری و عدالتی شعبوں میں کاغذ کی مانگ کے باعث مجموعی طلب میں 3 سے 4 فیصد اضافہ ہو سکتا ہے۔