ایجنسیاں
جموں؍۱۰ جولائی
امرناتھ یاترا کے دوران سیکورٹی کے سخت انتظامات کے تحت جموں و کشمیر پولیس نے جمعہ کے روز ضلع سانبہ میں سرچ اینڈ کارڈن آپریشن (سی اے ایس او)، ایریا ڈومینیشن مشق اور ریلوے ٹریک کی سینیٹائزیشن انجام دی۔ حکام نے یہ جانکاری دی۔
۵۷ روزہ امرناتھ یاترا ۳ جولائی کو ضلع اننت ناگ کے۴۸ کلومیٹر طویل ننون-پہلگام راستے اور ضلع گاندربل کے۱۴ کلومیٹر طویل اور نسبتاً دشوار گزار بالتل راستے سے شروع ہوئی تھی، جو۲۸؍ اگست کو اختتام پذیر ہوگی۔
حکام کے مطابق’’یہ آپریشن اضافی سپرنٹنڈنٹ آف پولیس، سانبہ کی نگرانی میں نوناتھ کھڈ، گھگوال اور ان سے متصل ریلوے ٹریک کے حساس علاقوں میں انجام دیا گیا‘‘۔
انہوں نے بتایا کہ اس کارروائی میں اسپیشل آپریشنز گروپ (ایس او جی) سانبہ، سی آر پی ایف کی۹۳ ویں بٹالین اور گورنمنٹ ریلوے پولیس (جی آر پی) کی مشترکہ ٹیموں نے حصہ لیا۔ اس مشق کا مقصد ملک دشمن سرگرمیوں کی روک تھام اور ضلع میں سیکورٹی نظام کو مزید مضبوط بنانا تھا۔
حکام کے مطابق، سیکورٹی اہلکاروں نے حساس مقامات کی باریک بینی سے تلاشی لی اور علاقے میں واقع ایک متروکہ عمارت میں بھی سرچ اینڈ کارڈن آپریشن (سی اے ایس او) انجام دیا تاکہ اس بات کو یقینی بنایا جا سکے کہ اسے سماج دشمن یا ملک دشمن عناصر کی جانب سے استعمال نہ کیا جا رہا ہو۔
انہوں نے بتایا کہ علاقے سے گزرنے والے ریلوے ٹریک کو بھی گورنمنٹ ریلوے پولیس (جی آر پی) کے اشتراک سے مکمل طور پر سینیٹائز کیا گیا تاکہ ریل خدمات کی حفاظت کو یقینی بنایا جا سکے۔
حکام کے مطابق، آپریشن کے بعد امرناتھ یاترا کی سیکورٹی پر جموں،سری نگر قومی شاہراہ پر تعینات پولیس اہلکاروں کو بریفنگ دی گئی اور انہیں ہدایت دی گئی کہ وہ انتہائی چوکس رہیں، مشتبہ نقل و حرکت پر کڑی نظر رکھیں اور اس بات کو یقینی بنائیں کہ قومی شاہراہ کے کنارے کوئی غیر مجاز گاڑی کھڑی نہ ہو۔
پولیس نے کہا کہ دیگر سیکورٹی ایجنسیوں کے اشتراک سے اس نوعیت کی ایریا ڈومینیشن مشقیں اور سرچ آپریشن آئندہ بھی جاری رہیں گے تاکہ ضلع میں سیکورٹی نظام کو مزید مضبوط بنایا جا سکے اور امن و امان برقرار رکھا جا سکے۔
۔۔۔۔۔۔۔
