ایجنسیاں
سرینگر؍۸ جولائی
ضلع گاندربل میں امرناتھ یاترا سے متعلق ڈیوٹی میں مبینہ غفلت برتنے کے الزام میں چار اساتذہ کو فوری طور پر معطل کر دیا گیا ہے۔
حکام کے مطابق یہ کارروائی چیف ایجوکیشن آفیسر (سی ای او) گاندربل کی جانب سے جاری کیے گئے ایک حکم نامے کے تحت عمل میں لائی گئی۔ حکم نامے میں بتایا گیا ہے کہ یہ اقدام اسسٹنٹ کمشنر ریونیو گاندربل، جو منی گام ٹرانزٹ کیمپ کے نوڈل افسر بھی ہیں، کی جانب سے موصولہ مراسلے کی بنیاد پر اٹھایا گیا۔
معطل کیے گئے اساتذہ میں ہری پورہ کنگن کے بلال احمد شیخ، منی گام کے عابد محی الدین بٹ، وُوسن کے پیر مدثر اور گنڈ کے گوہر رشید کولو شامل ہیں۔
حکم نامے کے مطابق معطلی کا فیصلہ نوڈل افسر کے۷ جولائی۲۰۲۶ ء کے مکتوب کے تناظر میں کیا گیا اور یہ فوری طور پر نافذ العمل ہو گیا۔
حکم نامے کی نقول ڈپٹی کمشنر گاندربل، ڈائریکٹر اسکول ایجوکیشن کشمیر، نوڈل افسر ٹرانزٹ کیمپ منی گام، متعلقہ ڈرائنگ اینڈ ڈسبرسنگ آفیسر (ڈی ڈی او) اور دیگر متعلقہ حکام کو ضروری کارروائی اور اطلاع کے لیے ارسال کر دی گئی ہیں۔
حکم نامے میں ان الزامات یا مبینہ غفلت کی نوعیت کی وضاحت نہیں کی گئی جن کی بنیاد پر اساتذہ کو معطل کیا گیا۔ تاہم حکام کا کہنا ہے کہ یہ کارروائی منی گام ٹرانزٹ کیمپ میں جاری شری امرناتھ یاترا کے انتظامات کے سلسلے میں تفویض کردہ فرائض کی انجام دہی میں مبینہ کوتاہی کے باعث کی گئی ہے۔
