بالٹک ممالک نے یوکرین کو ڈرون حملوں کے لیے فضائی حدود فراہم کی: روس

ماسکو، 4 جولائی (اسپوتنک/یواین آئی) روس کے نائب وزیر خارجہ میخائل گالوزین نے الزام لگایا ہے کہ بالٹک ممالک نے روسی انفراسٹرکچر پر حملہ کرنے والے یوکرائنی ڈرونز کو اپنی فضائی حدود فراہم کی ہیں۔
اسپوتنک سے بات کرتے ہوئے، مسٹر گالوزین نے کہا کہ روس کے پاس اس بات کے پختہ ثبوت ہیں کہ لاٹویا اور دیگر بالٹک ممالک نے یوکرین کے ڈرونز کو روسی شہری انفراسٹرکچر پر حملہ کرنے کے لیے اپنی فضائی راہداریوں کا استعمال کرنے کی اجازت دی ہے۔انہوں نے دعویٰ کیا کہ حال ہی میں کئی بار یوکرائنی ڈرون بالٹک ممالک کی فضائی حدود میں داخل ہوتے دیکھے گئے ہیں۔ تاہم ایسٹونیا، لاٹویا اور لیتھوانیا پہلے ہی کہہ چکے ہیں کہ انہوں نے یوکرین کو روس میں اہداف پر ڈرون حملوں کے لیے اپنی فضائی حدود استعمال کرنے کی اجازت نہیں دی ہے۔
نائب وزیر خارجہ نے روسی سرحد کے قریب لٹویا میں ڈرون فیکٹری قائم کرنے کے منصوبے پر بھی تنقید کرتے ہوئے اسے اشتعال انگیزی قرار دیا۔ انہوں نے کہا کہ یہ اقدام بالٹک ممالک کی روس کے خلاف مخاصمانہ پالیسی کے مطابق ہے۔
مسٹر گالوزین کے مطابق، بالٹک ممالک یورپی یونین کی عسکری مہم کے ایک حصے کے طور پر دفاعی اخراجات میں اضافے سے فائدہ اٹھانے اور نیٹو کے مشرقی محاذ کے ایک اہم حصے کے طور پر خود کو قائم کرنے کے لیے ایسے اقدامات کر رہے ہیں۔