پہلا قافلہ جمعرات کی صبح بھگوتی نگر یاتری نیواس سے روانہ ہوگا‘ ایل جی ہری جھنڈی دکھائیں گے‘آف لائن رجسٹریشن شروع
ایل جی کا یاتری نیواس کا دورہ‘یاترا کے انتظامات کا جائزہ‘ سیکورٹی، صحت، صفائی، بجلی، پانی اور دیگر سہولیات کا معائنہ
(ویب ڈیسک )
جموں؍ یکم جولائی
سالانہ شری امرناتھ یاترا کے لیے آف لائن رجسٹریشن کا آغاز بدھ کے روز ہو گیا، جس کے ساتھ ہی ملک کے مختلف حصوں سے آئے سینکڑوں یاتری مقررہ رجسٹریشن مراکز پر پہنچ گئے۔
جموں و کشمیر کے لیفٹیننٹ گورنر منوج سنہا جمعرات کو بھگوتی نگر یاتری نیواس سے یاتریوں کے پہلے قافلے کو روانہ کریں گے۔
۵۷روزہ یاترا کا آغاز۳ جولائی سے سطح سمندر سے۳۸۸۰ میٹر بلند مقدس امرناتھ غار کی طرف دو راستوں سے ہوگا۔ ان میں ضلع اننت ناگ کا روایتی۴۸ کلومیٹر طویل ننون،پہلگام راستہ اور ضلع گاندربل کا نسبتاً مختصر مگر دشوار گزار۱۴ کلومیٹر طویل بالتل راستہ شامل ہیں۔حکام کے مطابق اب تک تقریباً چار لاکھ عقیدت مند آن لائن رجسٹریشن کرا چکے ہیں۔
جموں میں رات بھر ہونے والی بارش کے باعث موسم خوشگوار ہو گیا، تاہم اس کے باوجود یاتریوں کے جوش و خروش میں کوئی کمی نہیں آئی۔ بڑی تعداد میں یاتری صبح سویرے ہی رجسٹریشن مراکز کے باہر قطاروں میں کھڑے نظر آئے تاکہ یاترا کے لیے اپنا رجسٹریشن پاس حاصل کر سکیں۔
بدھ کی صبح ٹوکن رکھنے والے یاتریوں کی موقع پر رجسٹریشن کا عمل شروع کیا گیا، جبکہ ملک کے مختلف حصوں سے جموں پہنچنے والے عقیدت مندوں میں مسلسل دوسرے روز بھی ٹوکن تقسیم کیے گئے۔
رجسٹریشن اور ٹوکن تقسیم کرنے کے لیے تاوی ریور فرنٹ (جموں مصنوعی جھیل کے قریب)، گیتا بھون، رام مندر اور بھگوتی نگر میں خصوصی مراکز قائم کیے گئے ہیں۔
یاتریوں کے پہلے قافلے کو جمعرات کی صبح بھگوتی نگر یاتری نیواس بیس کیمپ سے باقاعدہ طور پر روانہ کیا جائے گا۔
اس دوران جموں کشمیر کے لیفٹیننٹ گورنر منوج سنہا نے بدھ کے روز جموں میں واقع بھگوتی نگر یاتری نیواس کا دورہ کیا اور شری امرناتھ جی یاترا کے آغاز سے قبل یاتریوں کے لیے کیے گئے انتظامات کا تفصیلی جائزہ لیا۔
لیفٹیننٹ گورنر نے لاجسٹک انتظامات، رہائش، سیکورٹی، طبی سہولیات، ہیلپ ڈیسک، صفائی ستھرائی، بجلی اور پانی کی فراہمی، ہنگامی خدمات اور دیگر بنیادی سہولیات کا معائنہ کیا تاکہ یاتریوں کو آرام دہ، محفوظ اور بلا رکاوٹ سفر کی سہولت فراہم کی جا سکے۔
سنہا نے متعلقہ افسران کو ہدایت دی کہ یاتریوں کی متوقع بڑی تعداد کو مدنظر رکھتے ہوئے افرادی قوت کے انتظام کو مزید مضبوط بنایا جائے تاکہ تمام خدمات مؤثر انداز میں فراہم کی جا سکیں۔
لیفٹیننٹ گورنر نے بھگوتی نگر یاتری نیواس اور تاوی ریور فرنٹ پر باقاعدہ عوامی اعلانات کرنے پر بھی زور دیا تاکہ یاتریوں کو ضروری معلومات بروقت فراہم کی جا سکیں۔
اس موقع پر انہوں نے بابا برفانی کے درشن کے لیے آئے عقیدت مندوں سے بھی ملاقات کی اور ان کے لیے محفوظ، پُرامن اور بابرکت یاترا کی نیک خواہشات کا اظہار کیا۔
