ایجنسیز
جموں؍۱۹جون
جموں کشمیر پولیس نے ضلع کشتواڑ میں دہشت گردوں کی معاونت کے الزام میں دو مشتبہ معاونین کو گرفتار کیا ہے۔
حکام نے جمعہ کے روز بتایا کہ یہ کارروائی ملک دشمن عناصر اور مقامی دہشت گردوں کی مدد کرنے والے نیٹ ورکس کے خلاف جاری مہم کا حصہ ہے۔
پولیس کے مطابق تازہ گرفتاریوں کے بعد اس مقدمے میں گرفتار افراد کی مجموعی تعداد چار ہو گئی ہے۔
یہ گرفتاریاں پولیس اسٹیشن کشتواڑ میں درج ایک مقدمے کے سلسلے میں عمل میں لائی گئیں۔ حکام کا کہنا ہے کہ یہ کارروائی ضلع کشتواڑ کے دچن علاقے میں سرگرم دہشت گردی کے معاون ڈھانچے کو ختم کرنے کی مسلسل کوششوں کا حصہ ہے۔
سینئر سپرنٹنڈنٹ آف پولیس (ایس ایس پی) کشتواڑ‘نریش سنگھ نے بتایا کہ تفصیلی تحقیقات کے بعد پولیس نے محکمہ جنگلات کے ایک سرکاری ملازم طارق احمد گینو اور محمد اقبال، دونوں ساکنان ٹنڈر دچن، کو دہشت گردانہ سرگرمیوں میں معاونت کے الزام میں گرفتار کیا ہے۔
انہوں نے کہا کہ ابتدائی تحقیقات سے معلوم ہوا ہے کہ دونوں ملزمان علاقے میں سرگرم مقامی دہشت گردوں کو مختلف نوعیت کی معاونت فراہم کر رہے تھے۔
ایس ایس پی کے مطابق اسی مقدمے میں اس سے قبل منیر احمد اور مشکور احمد، دونوں ساکنان چھاترو، کو بھی اسی نوعیت کے الزامات کے تحت گرفتار کیا جا چکا ہے۔
انہوں نے مزید کہا کہ تحقیقات جاری ہیں اور اس نیٹ ورک سے وابستہ تمام افراد کی شناخت اور گرفتاری کے لیے کوششیں تیز کر دی گئی ہیں۔
