ایران کا بحرین میں امریکی ففتھ فلیٹ ہیڈکوارٹر اور ایئربیس نشانہ بنانے کا دعویٰ

تہران، 3 جون (یو این آئی) ایران نے بحرین میں امریکی ففتھ فلیٹ ہیڈکوارٹر اور ایئربیس نشانہ بنانے کا دعویٰ کیا ہے۔
ایران کے پاسداران انقلاب کا کہنا ہے کہ انھوں نے امریکی ففتھ فلیٹ ہیڈکوارٹر، ایئر بیس اور آبنائے ہرمز میں بحری جہاز پر میزائل اور ڈرون حملے کیے ہیں اور یہ حملے امریکہ کی جانب سے ایرانی بحری جہاز کو نشانہ بنانے کے جواب میں کیے گئے ہیں۔ ایرانی میڈیا کے مطابق پاسداران انقلاب کا کہنا ہے کہ امریکہ کو آبنائے ہرمز کی سیکیورٹی متاثر کرنے کی قیمت چکانا ہوگی۔
دوسری طرف امریکی سینٹرل کمانڈ نے کہا ہے کہ امریکی فورسز نے متعدد ایرانی میزائل اور ڈرون مار گرائے ہیں، امریکی فورسز نے ایرانی جزیرہ قشم پر فوجی تنصیبات پر حملے بھی کیے۔
سینٹکام کے مطابق ایران نے ہمسایہ ممالک کویت اور بحرین پر میزائل داغے، لیکن امریکی اور بحرینی فوج نے انھیں مار گرایا، جب کہ بحری جہازوں پر ایران کے 3 ڈرون حملے بھی ناکام بنا دیے گئے ہیں۔ سینٹکام کا کہنا ہے کہ بحرین میں امریکی ففتھ فلیٹ ہیڈکوارٹر اور ایئربیس کو پاسداران کا نشانہ بنانے کا دعویٰ غلط ہے۔واضح رہے کہ امریکی صدر ڈونلڈ ٹرمپ نے سوشل میڈیا پر ایک بیان میں کہا ہے کہ ایران اور امریکہ کے درمیان بات چیت رکنے کی خبریں غلط اور بے بنیاد ہیں، ایران سے گفتگو مسلسل جاری ہے، تاہم یہ بات چیت کس سمت جائے گی، یہ کوئی نہیں جانتا۔ انھوں نے کہا ایران سے کہا ہے کہ وقت آ گیا ہے کسی نہ کسی طرح معاہدہ کر لیں، 47 سال سے ایران جو کر رہا ہے اسے مزید ایسا کرنے کی اجازت نہیں دی جا سکتی۔ انھوں نے بتایا کہ ایران کے ساتھ 4 دن پہلے، کل اور آج بھی رابطے ہوئے ہیں، مذاکرات کہاں تک پہنچتے ہیں یہ کہنا قبل از وقت ہے۔