جموں؍۲۲ مئی
جموں میں۲۲سالہ ایک خاتون نے مبینہ طور پر اپنے بوائے فرینڈ کی جانب سے فون کالز کا جواب نہ ملنے پر خود کو آگ لگا لی۔ پولیس نے جمعہ کو یہ جانکاری دی۔
پولیس کے مطابق یہ واقعہ جمعرات کو توی پل کے نزدیک پیش آیا، جہاں خاتون نے مبینہ طور پر اپنے اوپر آتش گیر مادہ ڈال کر غصے کی حالت میں خود کو آگ لگا لی۔
انہوں نے بتایا کہ راہگیروں نے فوری طور پر خاتون کی مدد کے لیے دوڑ لگائی اور آگ بجھانے میں کامیاب ہوگئے، جس کے بعد پولیس اہلکاروں نے اسے علاج کے لیے اسپتال منتقل کیا۔
پولیس کے مطابق خاتون تقریباً۸۰فیصد جھلس گئی ہے اور اس وقت زیرِ علاج ہے۔
ایک سینئر پولیس افسر نے کہا کہ ابتدائی تحقیقات سے معلوم ہوتا ہے کہ اس واقعے کی وجہ دونوں کے درمیان تعلقات میں کشیدگی تھی۔
افسر نے بتایا کہ جمعرات کی رات مجسٹریٹ کی موجودگی میں اسپتال میں خاتون کا بیان ریکارڈ کیا گیا۔انہوں نے کہا’’خاتون نے تفتیش کاروں کو بتایا کہ گزشتہ دو سے تین دن سے اس کی اپنے بوائے فرینڈ سے بات نہیں ہوئی تھی کیونکہ وہ اس کی کالز کا جواب نہیں دے رہا تھا۔ اس نے کہا کہ اس کا مرنے کا کوئی ارادہ نہیں تھا بلکہ اس نے غصے میں آکر یہ قدم اٹھایا۔‘‘
