ایجنسیز
سرینگر؍۱۱مئی
پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی کی صاحبزادی التجا مفتی کا ایکس (سابقہ ٹوئٹر) اکاؤنٹ بھارت میں معطل کر دیا گیا ہے۔
سوشل میڈیا پلیٹ فارم ایکس نے کہا ہے کہ یہ کارروائی ایک قانونی مطالبے کے جواب میں کی گئی ہے۔
التجا مفتی کا اکاؤنٹ اس وقت معطل کیا گیا جب چند روز قبل سائبر پولیس کشمیر نے ان کے خلاف ایک ویڈیو کلپ کے سلسلے میں ایف آئی آر درج کی تھی، جس میں مرحوم علیحدگی پسند حریت رہنما سید علی شاہ گیلانی کو دکھایا گیا تھا۔
بھارت میں صارفین جب التجا مفتی کا ایکس اکاؤنٹ کھولنے کی کوشش کرتے ہیں تو انہیں ایک نوٹس دکھائی دیتا ہے، جس میں کہا گیا ہے کہ قانونی درخواست کی تعمیل میں اس اکاؤنٹ تک رسائی محدود کر دی گئی ہے۔
