عوامی فلاحی اقدامات کی بروقت فراہمی کو یقینی بنانے پر زور
ڈی آئی پی آر
سرینگر؍۵مئی
وزیر اعلیٰ عمر عبداللہ نے آج سول سیکریٹریٹ میں ایک اعلیٰ سطحی اجلاس کی صدارت کرتے ہوئے۲۰۲۶۔۲۷کے بجٹ اعلانات پر عملدرآمد کی پیش رفت کا جائزہ لیا اور عوامی فلاحی اقدامات کی بروقت فراہمی کو یقینی بنانے پر زور دیا۔
اجلاس کے آغاز میں ایڈیشنل چیف سیکریٹری فنانس شیلندر کمار نے وزیر اعلیٰ کو مختلف محکموں کے تحت بجٹ اعلانات کی صورتحال اور پیش رفت سے آگاہ کیا۔
بعد ازاں مختلف محکموں کے انتظامی سیکریٹریز نے اپنے اپنے شعبوں میں بجٹ تجاویز پر ہونے والی پیش رفت اور اٹھائے گئے اقدامات کی تفصیلات پیش کیں۔
اجلاس میں جنرل ایڈمنسٹریشن، پلاننگ، ڈیولپمنٹ اینڈ مانیٹرنگ، اطلاعات، سائنس و ٹیکنالوجی، پاور ڈیولپمنٹ، اسکولی تعلیم، قانون، انصاف و پارلیمانی امور، مالیات، زراعتی پیداوار، خوراک، شہری رسد و امور صارفین، ثقافت، تعمیرات عامہ، جل شکتی اور ہاؤسنگ و اربن ڈیولپمنٹ سمیت متعدد محکموں کا جائزہ لیا گیا۔
غور و خوض کے دوران وزیر اعلیٰ نے عملدرآمد کو تیز کرنے، بین محکمانہ تال میل کو مضبوط بنانے اور مقررہ مدت کی سختی سے پابندی یقینی بنانے کے لیے متعدد ہدایات جاری کیں۔ انہوں نے کہا کہ بجٹ اعلانات کو زمینی سطح پر ٹھوس نتائج میں تبدیل کرنا ناگزیر ہے اور اس عمل میں کارکردگی، شفافیت اور عوامی فلاح کو مرکزی حیثیت حاصل ہونی چاہیے۔
وزیر اعلیٰ نے وسائل کی منصفانہ تقسیم کے ذریعے تمام خطوں میں یکساں ترقی کو یقینی بنانے پر بھی زور دیا۔
حکومت کے ترقی اور بہتر طرزِ حکمرانی کے عزم کو دہراتے ہوئے وزیر اعلیٰ نے تمام محکموں کو ہدایت دی کہ وہ پیش رفت کی مسلسل نگرانی کریں اور رکاوٹوں کو فوری دور کریں تاکہ بجٹ کے فوائد بروقت عوام تک پہنچ سکیں۔
اجلاس میں نائب وزیر اعلیٰ سریندر کمار چودھری، وزراء سکینہ ایتو، جاوید رانا، جاوید ڈار اور ستیش شرما، وزیر اعلیٰ کے مشیر ناصر اسلم وانی، چیف سیکریٹری اٹل ڈلو، ایڈیشنل چیف سیکریٹری برائے وزیر اعلیٰ دھیرج گپتا، جل شکتی، تعمیرات عامہ اور مالیات کے ایڈیشنل چیف سیکریٹریز، تمام انتظامی سیکریٹریز، محکمہ مالیات کے سینئر افسران، محکموں کے سربراہان اور دیگر متعلقہ حکام نے شرکت کی۔
